Governor in ASM Annual Conference a hmanpui

Association of Surgeons of Mizoram chuan niminpiah tlai khan RB Mc Cabe Hall, Aijal Club-ah Annual Conference hmangin he hun hi Governor Dr. Hari Babu Kambhampati chuan Khuallian niin a hmanpui a ni.

Association of Surgeons of Mizoram Annual Conference-ah hian Governor chuan Damlo zai ngai zaitu bik Doctor (Surgeon) te khawmpui-a a tel thei chu lawmawm a tih thu sawiin, Surgeon te thawhrimna leh an thil tawn tam tak atang hian damlo te enkawlna tha zawk thiamna thar tam tak a lo chhuak tawh a. Damlo enkawlna leh natna zirchianna kawngah Surgeon ten an thawh hlawk hle tih a sawi.

Larsap chuan Surgeon te hna chu hna pawi-mawh tak, mipui tena kan mamawh a nih rualin, hna khirh leh fimkhur ngai tak a nih thu leh tihfuh loh palh chang a thleng a thlen ve zeuh thin thu a sawi a. Heng ah te hian Surgeon ten mipui dem an hlawhin an hna thawh that te a hliah khuh thei thin a. Theihtawp chhuah a, an finna leh thiamna te damlo enkawl damna atana hmangtu Doctor te chu mipui ten an zah thiam a, an rawngbawlna hlu tak te hi kan hlut thiam a ngai tih a sawi. Doctor te pawh sawiselna a lo awm pawhin zam mai lovin, tihdam rawngbawlna thawktu, hna zahawm bik thawktu an nih angin tha takin an hna te uluk leh zuala an thawh a ngai tih a sawi a. Zoram hmun chengker leh kilkhawra tihdam rawngbawl hna thawktute hian mipui lam atanga thlawpna leh an hnathawh hlutsak an phu thu a sawi bawk.

Governor chuan nikum lama ZMC a Surgeon te hlawhtlinna ropui tak sawi langin, “Dr. John Lalliandinga kaihhruai Medical Team-in Zoram Medical College-a Cconjoined twins hlawhtling taka an zai kha thil ropui tak a ni a. ASM chhungkua te he hlawhtlinnaah hian ka lawmpui a, ka chhuang a ni,” a ti a. NHM hnuaia Central sawrkarin kan lo hrisel zawkna tur leh hma kan lo sawn deuh deuh na turin hmalakna pawimawh tak tak a neih thu te pawh a sawi bawk.