CADC-a CEM hlui nupui lung In tang tura hrem a ni

Chakma Autonomous District Council (CADC)-a CEM hlui thi tawh Buddha Lila Chakma nupui, Sujata Chakma chu tih chingpen thubuai ah thiamloh chantir niin kum 4 chhung Jail tang tur leh cheng nuai 12 chawi tura hrem a ni.

Special Judge (Prevention of Corruption Act) Dr. HTC. Lalrinchhana chuan kar kalta Zirtawpni khan Sujata Chakma hi IPC Section 409/420 leh 120 B bakah Prevention of Corruption Act, 1988 section 13 (2) r/w 13 (1)(c) leh (d) leh IPC section 120B hmangin thiam loh a chantir tawh a, he thubuai a mawhphurtu a puh Buddha Lila Chakma erawh chu a thubuai ngaihtuah laiin nikum October ni 10 khan a thih avangin Court thutlukna-ah a lang ve ta lo a, a nupui Sujata Chakma erawh a pasal nena Rs. 34,66,585 tihchingpen thubuaiah Special Judge chuan thiamloh chantirin kum li (4) chhung Jail tang tur leh cheng nuai 12 chawi tura hremin Pawisa hi a pe thei lo a nih chuan kum 6 dang Jail-ah a tan belh a ngai dawn a ni.

Kum 2012 khan 13th Finance Commission chuan CADC Session Hall sakna a tan cheng nuai 300 ruahmanin cheng nuai 232 chu Mizoram sawrkar in CADC kutah a pe a. CADC chuan R. Vanlalhluna, Edenthar Veng, Aizawl chu Rs. 250,63,138/- hmanga he hna hi thawk turin March ni 14, 2013 khan inremna an siampui a, March ni 14, 2015 a thawk zo tura tih a ni. Contractor-in he hna a thawhna sum thawh hnihna a dawn hma deuhin khatih hunlaia CADC-a CEM lo ni ta Buddha Lila Chakma chuan he hna hi Contractor Pu R. Vanlalhluna hnen atanga chhuhsakin a nupui Sujata Chakma chu inremna ‘Power of Attorney’ (Deed of Agreement) hmangin a thawh chhunzawm tir a, Court-a thuhretute thusawi atanga tarlan a nih dan chuan Buddha Lila Chakma hian contractor hnenah hian harsatna hrang hrang siam luiin, dan anga a thawh tur ang bak pawh a thuneihna hmangsual in thawh luih tir a tum thin a, Contractor pawh hian Sujata Chakma hnenah hna hi pe lo thei lo dinhmun ah a ding niin an sawi a ni.