Vairengte-Sairang kawng siam dan tur sawiho a ni

Mizoram chak lakna kawngpui Vairengte leh Sairang inkar kawng chhe zual thawm vat dan tur leh Four Lane tura hnathawh tan thuai dan tur ngaihtuahin nimin khan Chief Minister Lalduhoma hovin PWD Minister Vanlalhlana leh hnathawh tur kaihhnawih Department mi pawimawhte chu CM Meeting Hall-ah an thukhawm a. He hunah hian PWD Minister chuan kawngpui repair a tul tawh zia te, mipuite mamawh phur thin Truck Owners Association te pawhin Chief Minister hnena an thlen tawh thu leh Fur a lo thlen leh mai dawn vanga hmanhmawh a tul thute a sawi a. Hemi hnu hian hmalak nghal dan tur an sawi zui nghal a ni.

He hunah hian NHIDCL lam chuan an chanpual chin te chu Fur tlak hmaa a tulzual an khawih theih tur thu an sawi a. Forest Clearance a fel chuan Four Lane hna pawh an tan nghal mai dawn tih an sawi a. PWD lam te pawhin an enkawl chin chu a chhiat lutuk loh thu leh a tul zual lai an khawih nghal tur thu an tarlang a. Council of Minister thukhawm in a ngaihtuahzui ngai thil te chu Council of Minister Meeting neih leh hmasa bera agenda atan dah peih hman an tum bawk.