Tharchhuah hralhna lam tinzawn (market based) hmanga Agriculture kalpui tum a ni

Agriculture Minister P.C. Vanlalruata chuan Agriculture chu tharchhuahte hralhna lam tinzawn (market based) hmanga kalpui tum a nih thu a sawi.

Directorate of Agriculture Conference Hall, Aizawl-a Agriculture Department in Department kaltlanga hmalakna hrang hrangte thlirletna leh hmalak zel dan tur kawnga chipchiar taka inrawnkhawmna nimin-a an buatsaih a hmanpuina ah Agriculture Minister chuan Agriculture chu kum tam tak chhung thar tam lam tinzawn (production based) ringawta a kal thu sawiin, tunah chuan tharchhuahte hralhna lam tinzawn (market based) hmanga kalpui tum a nih thu leh 'Market First' ti a kal chu a hun tawh takzet thu a sawi a. Sawrkarin a hralhna tur lam ngaipawimawhin Sawhthing, Aieng, Hmarcha leh Hmunphiah hralhna tur sum a dah thu leh rate mumal tak a duan thu sawiin, nakum Budget pharh hma ngeiin buhfai rate pawh siama loneitute tana puanzar hman tum a nih thu a sawi a, Tung pawh sawrkarin a ngaih pawimawh dawn thu a sawi bawk a. Tunhnaiah sawrkar laipui hotute Agriculture tihhmasawn nana dawr a nih thu sawiin, buh leh thlai tam zawk thar theihna hmun potential area cheibawl bakah Farm Mechanisation ngaih pawimawh tum a nih thu a sawi bawk.

Sawrkar tharin mimal ni lovin Society behchhana hmalak a ngaih pawimawh thu pawh Agriculture Minister chuan sawiin, hemi tur hian Line Department dangte nena thawhho dan tur ngaihtuah tlan a tul dawn thu a sawi a. Sustainable Agriculture tihhmasawn leh ngaihpawimawh tum a nih thu leh Compact Area-ah awmze nei zawka hmalak tum a nih thu sawiin, sum siam nana hmun hrang hranga hmalak aiin hlawhtling ngei turin hmasawnna ruhrel neihte tang tlang thei tura tanlak tum a ni, a ti a. A nihna tur taka sawrkar sum hman leh scheme kalpui a tul thu sawiin, rilru leh ngaihtuahna seng tlang turin kalkhawmte a chah a. Agriculture Department hotu kalkhawmte chu ram innghahna lungphum leh Agriculture dinhmun thlak danglam theitu an ni tih hria a, ram hmasawnna tura thahnemngai taka thawhpuiah a sawm nghal bawk.

He hun kaihruaitu Agriculture Secretary Dr. H. Lianzela chuan buh leh thlai tharchhuah tipung turin loneitute hnenah an let leh a ngai tih sawin, Technology thar, zirbingna, soil quality tih that leh land holding siamthat, tuilakna leh inrelbawlna siamthat, Agriculture infrastructure tihchangtlun, Agriculture Credit leh Crop Insurance tihchak leh buh leh thlai tharchhuah hralhna tur Market dap kawnga tanlakte chu hmasawn zel tura ngaih pawimawh hmasaka neih a tul thu a sawi a. Sawrkar thar ngaih pawimawh zingah Agriculture dah a ni chu Department tana thu lawmawm leh phurawm a nih thu sawiin, hei hi Green Revolution thlen tura hun remchang a ni tih hria a, ram awl tam takte a nihna tur ang taka hmanga intodelh tuma tanlak a tul thu pawh a sawi bawk a ni.