PWD Minister in Sairang leh Vairengte inkar kawng a tlawh

PWD Minister Vanlalhlana chuan nimin khan Mizoram chak lakna kawngpui pawimawh ber pakhat, National Highway 06 leh 306, Sairang atanga Vairengte inkar kawngpui chu a hmunah tlawhin a enfiah.

PWD Minister Vanlalhlana chuan Vairengte leh Sairang inkar kawngpui NH-306 leh 06 chu Mizoram mamawh chakkhai lakluhna kawngpui pawimawh ber pakhat a nih avangin siamthat thuai a tul thu a sawi a. Lirthei lian thil rit tak tak phurin a zawh reng a nih avangin a chhe chak hle tih sawiin, kumin Fur thlenhma ngeiin thawmthat hna thawh zawh hman a nih theih nan he lai kawng siam tha tura hma lakna awm mek pawh chak zawka kalpui turin PWD hotute leh NHIDCL lamte chu a chah a. Contractor-te pawh kawng siamthat nan lungchang tha leh hmanraw tha chauh hmang turin a chah bawk.

Vairengte atanga Sairang inkar kawng hi Kilometre 122-a thui a ni a. Kilometre 67.20-a thui chu NHIDCL kutah awmin, Kilometre 54.80 a thui chu Mizoram PWD kutah a awm rih thung a. PWD hian a theih ang angin kawng thawmthat hna hi thawk thinin, kumin Fur hma hian PWD leh NHIDCL hnuaia kawng awmte chu ngawrh zawka siamthat tumin hmalak mek a ni a. Hmalak zel dan tur pawh sawiho nghal a ni bawk.