Home Minister-ah ramri hung leh FMR a thlen

Mizoram Rajya Sabha MP K. Vanlalvena chuan India sawrkarin Indo-Myanmar ramri hung kalpui a tum chu Mizoram mipuite duhdan a ni lo a, he thutlukna hian Zoram mipuite a thawng hle a ni tih nimin khan Union Home Minister Amit Shah-a hnenah ziakin a thlen.

Union Home Minister hnena lehkha a thehluh ah hian British sawrkar in dik lo taka kan ramri min siamsak avangin Zofate chu India, Burma leh East Pakistan-ah te tihluihnaa thendarh kan nih thu leh he ramri diklo tak hi India Independence tirh atanga tun thlenga siam that a la ni lo chu Hnam anga inrahbehna a nih thu Rajya Sabha MP K. Vanlalvena chuan a ziak a. He ramri diklo hi siamthata rorelna pakhat hnuaia awm kan nghah reng laia Ramri hung tumna lo awm ta hian Zofate min barakhaih thu a ziak a ni.

Rajya Sabha MP chuan India Independence hnu kum 75 chhung zalen taka kan lo inkal-pawh thinna Free Movement Regime tihtawp tumna pawh hian ramri bulhnaia chengte ve ve tan harsatna nasa tak a siam tur thu thlen bawkin, Indo-Myanmar ramri hung hi ramri kaltlanga dan lova sumdawnna hrang hrang drugs leh ralthuam tawlhruk thin te hi a tihtawp beiseina avang a nih chuan fencing hian chung sumdawnna te chu a tawp phah dawn lo tih Bangladesh Border fencing siam zawh tawh atang hian a hriat theih thu leh Bangladesh ramri kaltlanga ralthuam tawlhruk vawi tam tak ramri vengtu ten an man thin dan atang hian a langfiah tih a sawi bawk.

Myanmar nena kan inrina hi hung a nih chuan kan Sangha manna tha tak KM 500 laia sei ramri-a luang mek kan lui te chu ramri pawn ah dah a nih dawn avangin kan hloh dawn tihna a nih thu pawh K. Vanlalvena chuan a sawi bawk a. Heng te avang hian Indo-Myanmar ramri hung tumna hi Mizoram-ah tih loh ni se tiin Union Home Minister hnenah hian a thlen a ni.