PM leh Union Home Minister te Lim Aizawl-ah an hal

Mizo Zirlai Pawl (MZP) chuan India leh Myan-mar ramri-a inkalpawhna titawp tur leh ramri hung tumna duh lovin nimin khan Prime Minister leh Union Home Minister te Lim chu Aizawl-ah an hal.

Prime Minister leh Union Home Minister lim halna puala inkhawm tawi Aizawl Treasury Square-a MZP Pisapui tual-a neih ah MZP President, Pu H. Lalthianghlima chuan, Zofate chu an duh reng vang ni loin, India, Myanmar leh Bangladesh-ah te then darh kan nih thu sawiin, India-a awmte pawh State hrang hrangah thendarh an nih thu leh he thilah hian Zofate chu rawn an nih loh avangin an tan pawm theih chi ni-a an ngaih loh thu a sawi a. India leh Myanmar ramri-a zalen taka inkalpawh theihna, Free Movement Regime tihtawp tuma sawrkar laipui hmalakna chu pawi a tih thu leh dodal zel an tum thu a sawi bawk. 

MZP chuan, danin a phal loh ruihhlo leh thil dang te chu ramri hung kher lo pawhin sawrkar laipui chu a tihrem dan ngaihtuah zawk tura an phut thu an sawi a, FMR chungchanga an ngaihdante Chief Minister leh Home Minister hnena an thlen tawh bakah Prime Minister, Union Home Minister leh Vice President hnenah lehkha an thehlut tawh bawk a, hetic hunga FMR tihtawp tumna lam hawi thu lawmawm an dawn loh avang leh sut ngei tura phut nan Prime Minister leh Union Home Minister te lim hi hal an nih thu an sawi a ni.