LESDE Minister in Union Minister a kawm

Ministry of Skill Development & Entrepreneurship (MSDE) enkawltu Minister of State Rajeev Chandrasekhar chu nimin khan LESDE Minister Lalnghinglova Hmar chuan New Delhi ah a kawm.

He an inkawmna ah hian Union Minister Rajeev Chandrasekhar chuan Mizoram sawrkar tharin Skill Development lama hmalak a tum tak tak chu lawmawm a tih thu sawiin, thil kalphung pangngai pet pet ni lo, Mizoram mil project siama an thehluh chuan a hlawhtlin theih nan theihtawpin a lo pui thu a hrilh a. Sawrkar laipuiin Skill Development leh Entrepreneurship lama hma a lâk nasat thu sawiin, hei hi India rampuma kalpui tur a ni a, chutih laiin mahni ram awm dan leh ram mite thiamna azirin an siam rem thiam tur a ni tiin a sawi bawk.

LESDE Minister Lalnghinglova Hmar chuan Chief Minister Lalduhoma hova 'Hand Holding Policy' kalpui tura Committee hranpa a din thu te, chumi kawng chuan MSDE chu nasa taka an behchhan tur thute a hrilh a; Union MoS Rajeev Chandrasekhar chuan Mizoram hmachhawpte chu a ministry kal dan nen thil inmil a nih thu a sawi bawk a ni.