January thla ah lirthei dan bawhchhia man tam

Kumin (2024) January thla chhung khan Aizawl-ah lirthei Dan bawhchhia 185 man an ni a, heng mite hremna pawisa chawi tlingkhawm chu cheng nuai 7 dawn a tling a ni.

Aizawl District Transport Office hnuaia Enforcement Staff te chhinchhiah danin, kumin January thla chhung khan lirthei chi hrang hrang 725 endik zingah 185 chu dan an bawhchhiat avangin man an ni a, heng mi ten hremna sum an chawi tlingkhawm chu cheng nuai 6.86 a tling a ni. Lirthei Dan bawhchhia te zingah bungraw phur lirthei, Light Goods Vehicle tam berin 53 man an ni a, khualzin phur Maxi Cab 41 man niin, bungraw phur lirthei lian chi 23 leh mimal lirthei LMV 34 man a ni bawk a, ke pahnih nei lirthei 14 bakah lei laihna 7 man a ni bawk. Lirthei man zinga a tam ber hi chhiah chawi tur ang pe lo an ni a, heng bakah hian Insurance thi tawh leh leh Vehicle Fitness-a tling lo te chu a tam zual an ni.

Lirthei dan bawhchhia zingah tlan tlang leh a hmuna sum chawi tur chawi nghal thei lo, e-challan hmanga an registration an tihtawp sak lailawk 11 a awm bawk a. Heng ho hremna atana sum chawi tur hi a vaiin Rs. 12,25,500/- a ni a, lirthei dan bawhchhia hremnaa sum chawitir hi a vaiin sawrkar sum bawmah chhunluh thin a ni.

Aizawl DTO hotute chuan kumtling lo lirthei khalhtir lo turin lirthei neitute an ngen thar a, a khalh tirtu leh a khalhtu chu hremna thuhmun reng a ni tih an sawi a. Tun thla hi Road Safety Month-a hman mek a ni tih mipui an hriattir thar bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result