ECI in Inthlan kaihhnawih Campaign leh hmalakna ah naupang hman khap a nih thu a tarlang

Election Commission of India (ECI) chuan inthlan kaihhnawih Campaign leh hmalakna reng rengah naupang hman khap tlat a nih thu leh hetiang zawnga hmalakna a awma man chhuah a nih chuan an chungah ngaihhnathiamna a awm dawn loh a sawi.

Hemi chungchanga thuchhuah a siamah ECI chuan Party, Candidate leh inthlanna kaihhnawiha thawktu zawng zawngte chu engti kawng pawha Political Campaign leh Rally-a naupang hmang lo turin a hriattir a, Political party-te chu inthlan campaign-ah naupangte chu eng ti kawng zawng maha hmang lo turin a hriattir a; Poster/Pamphlet sem emaw, Slogan auchhuah emaw, Campaign Rally, Election Meeting leh a dangte a tel tir lo turin a hriattir a. Inthlan kaih-hnawiah engti kawng zawng maha naupang hman a rem loh thu leh hmang lui an awma manchhuah an nih chuan an chungah ngaihhnathiamna lantir a nih dawn loh thu Party leh Candidate-te a hriattir a ni.

ECI in thuchhuah a siamah hian Political party-te chu inthlan campaign chi hrang hrang, Rally, Slogan auchhuah, Poster emaw Pamphlet sem emaw, Inthlan kaihhnawih thil dang emaw ah naupangte tel lo tura hriattirin “Political hruaitu leh candidate-te chuan naupangte chu engti kawng mahin campaign-na atan an hmang tur a ni lova, naupang kuah emaw, lirthei-a phurh emaw, Rally-a tel tir pawh phal a ni lo,” a ti a. He khapna hian naupangte chu political campaign ang chi reng reng siam nana hman thleng huamin, amaherawhchu, naupang chu a nu leh pa emaw, amah enkawltu te'n an hruai chuan Political Leader bul hnaiah pawh awm mah se, Political party-in inthlan campaign-na engmah a tih tir loh chuan inkaihhruaina bawhchhiatna anga ngaih a ni lo ang.

Election Commission of India chuan Political Party leh candidate zawng zawngte chu Child Labour (Prohibition and Regulation) Act, 1986, Child Labour (Prohibition and Regulation) Amendment Act, 2016 hmanga siamthat tawh chu khauh taka zawm vek tura hriattir an ni a, Naupang chhawrluih chungchanga thil tih leh dan kaihhnawih zawng zawngte tha taka zawm a nih theih nan District Election Officer leh Returning Officer-te chuan mawhphurhna an neih thu tarlang bawkin, an thuneihna hnuaiah thupek bawhchhiat a nih chuan an chungah na taka hremna lekkawh a nih tur thu a tarlang bawk.