Chief Minister in Union MoS for Finance hnenah Mizoram mamawh hrang hrangte a thlen

Chief Minister Lalduhoma chuan Union Minister of State for Finance Dr. Bhagwad Karad chu Inrinni khan kawmin Mizoram mamawh hrang hrang a thlen.

Chief Minister hian Dr. Bhagwad Karad hi New Delhi-a a chenna In-ah kawmin Mizoram-a Bank hrang hrangte chungchang a thlen a, Mizoram Rural Bank (MRB) chu Mizoram-a Bank inzarpharh zau ber leh mipuite pawhin an chhawr nasat a ni tih sawiin, an CD Ratio pawh a tha thin hle tih a sawi a. Chuvang chuan thawktute Allowances chu a sponsor Bank, SBI-a thawktute Allowances zat pek ve ni se tha a tih thu a thlen a. Mizoram-a Bank awmte, a bikin Regional Rural Bank ten thawktu indaihlohna a tawrh nasat avangin Mizoram tan emaw, India hmarchhak puala emaw-a thawktu tur lak runpui, Special Recruitment kalpui turin a ngen a ni. Hei bakah hian Chief Minister chuan Mizoram-ah Private Bank te an pun zel thu leh a lawmawm thu sawiin, “Heng Private Bank te hi thingtlang lamah an inzarpharh zau tawk lova, chuvang chuan mipuiten an lo chhawr tangkai tawk lo,” tiin zau zawka an inzarpharh theih nana hma laksak turin a ngen a ni.

Chief Minister chuan Private Bank awmsa te hian anmahni (Local Branch) in Sanctioning Power an neih loh hlawm avangin hna an thawk chak theih lo nia sawiin, Loan diltuten harsatna an tawk thin tih a sawi a. Mahni a sanctioning power neia an awm theih nan Private Bank thuneitu sangte lo ngen sak turin a ngen bawk a. Hei bakah hian Bank thenkhatten an hnena Loan diltute Income Tax Returns an lo phut thin tih pawh sawiin, Mizoram chu Income Tax pek lohna State a nih angin Bank te pawhin lo phut tawh lo thei se a duh thu leh hma lo laksak turin a ngen a ni.

Central sawrkar Interim Budget atanga a lan danin SASCI atan sum tam zawk ruahman a tum chu lawmawm a tih thu pawh Chief Minister hian Union Minister hi hrilhin, Mizoram tana a kalpui dan awlsam zawk (Special dispensation) awm thei se a duh thu a thlen a. 16th Finance Commission Funding dan turah pawh Chhiah lakkhawm tur (Revenue mobilise) nei tam lo tak a nih avangin Mizoram chu Special Category State a la dah chhunzawm zel turin a ngen bawk a ni.

Dr. Bhagwad Karad hian Chief Minister thil thlen te chu an pawimawh hlawm hle tih sawiin, Chief Minister awm lai ngei hian a kaihhnawih Official pawimawh te telna tur thutkhawm chu tun thla ni 16 a nei turin kohna a tichhuak nghal a ni.