Aizawl by-pass leiverh hna Company 17 in thawh tumin Tender an chhang tawh

Aizawl khawpui pumpelh kawng (Aizawl By-pass Road)-a KM 2 leh a chanve a thui leiverh thiang (Twin Tunnel) hnathawh tur thawh tumin Company lian 17-in National Highways and Infrastructure Development Corporation (NHIDC) Tender an chhang.

He hna thawh tur atan hian NHIDCL hian Zirtawpni khan Technical bid 17 hi hawngin hemi hnuah a pawisa lam 'Financial bid' la kalpui leh tur a ni a. Aizawl By-pass Road Project hian Sairang atangin Phaibawk a zawm dawn a, Lei (Bridge) liantham 10 leh lian tham lo pakhat dawh tur a ni dawn a ni. Kumin January 4-a sawrkar laipuiin hna thawh tura a pawm fel tak he leiverh thiang siamna atan hian cheng vbc. 1,313.28 ruahman a ni a, Leiverh hna hi a verhna khawl leh puak thei hmanga thawh tur a ni a, khawl lian tak Tunnel Boring Machines (TBMs) hman tangkai a ni ang.

He hna atan hian nikum October thla khan NHIDCL chuan Tender a lo chhuah tawh a, Tender a pawisa zat hi cheng vbc.893.79 a ni a. Kum 6 (thla 36) chhunga thawh zawh tura ruahman a ni a, hei hi National Highway No. 6, Sairang leh Phaibawk inkar, a lei verh thui zawng KM 2.5, a luhna (approach road) km 2.1 a thui, a vaiin km 4.60 a thui thawhna tur a ni a, package 2 huamchhunga mi a ni.

He kawngpui hian Aizawl khawpui paltlanga lirthei kal tam tak te a titlem dawn a, khawpui chhunga lirthei tam lutuk chu nasa takin a ti ziaawm dawn a ni. Hei bakah hian Aizawl khawpuia lirthei che vel himna a tisang zual ang a, khawpui hel kualtu kawngpui pawimawh leh tangkai tak a ni bawk ang. He kawng hi siam zawh a nih chuan Sairang leh Phaibawk inkar kawngpui hi KM 22 zetin a titawi dawn a, tuna kawng awmsa zawha he hmun pahnih thlen nana hun hman thin pawh darkar khat leh a chanve zetin a titlem dawn a ni.

Comments

Popular News (Last 30 Days)

Vawiin-ah HSSLC Exam result