VBSY in a tum ber chu kum 2047-a India ram Developed Nations zinga teltir a ni - Governor

Mizoram Governor Dr. Hari Babu Kambhampati chuan Viksit Bharat Sankalp Yatra (VBSY) in a tum ber chu kum 2047 a lo thlen hunah India ram chu Ram changkang (Developed Nation) zinga tel tir a ni tih sawiin, sawrkar laipui in mipuite hamthatna Scheme a siam mipui hrilhhriat kawngah tanlak a tul thu a sawi bawk.

Governor Dr Hari Babu Kambhampat hian nimin khan Aizawl Salem Veng YMA Hall-a Viksit Bharat Sankalp Yatra (VBSY) – Urban Campaign Programme chu khuallian nia hmanpuiin VBSY chu India Sawrkarin ram hmasawn zinga India ram hlankai a tumna kawnga hmalakna pawimawh tak tak a neih mek te hmawr bawkna atana Campaign pawimawh tak a nih thu a sawi a. “VBSY in a tum ber chu kum 2047 a lo thlen hunah India ram chu Ram changkang (Developed Nation) zinga tel tir a ni,” tiin India in he dinhmun a thlen theihna kawngah hian Mizoram pawhin tihtur tam tak a nei ve a, heng hmalakna hrang hrang te hi tih puitlin a nih chuan Mizoram pawhin nasa takin hlawkna a tel dawn a ni, a ti bawk.

Aizawl District Bawrhsap Nazuk Kumar-i kaihhruai he hunah hian Governor chuan VBSY hi nikum November thla khan Prime Minister in a lo hawng tawh tih sawiin, VBSY in a tum zinga Welfare Scheme hrang hrangte la dawng ve lo ten an dawn theihna turin amah pawhin a kalna hmun leh program a hmanna apiangah a lo tlangau pui thin tawh tih a sawi a. Mizoram-ah central sawrkar hnuaia Welfare Scheme tha tak tak awm tih Mizoram mipui tam zawkin an la hrechiang mang lo tih a hmuh thu a sawi a. Beneficiary te hian an tana Scheme tha tam tak awm mek te hi an hriat phawt chuan an hman tangkai duh ngei a rin thu leh heng Scheme tha tak tak la hre ve lo te hriattir chu a hre tawh sa te, Official te, zirtirtute leh zirlaite mawhphurhna nia a hriat thu a sawi a, hemi kawngah hian tanlak a ngaih thu a sawi bawk.

VBSY program hi niminpiah thleng khan hmun 344-ah neih a ni tawh a, heng ah te hian mi 30,561 an tel tawh a Heng program hman tawhna zinga Gram Panchayat 124-ah chuan Ayushman Bharat Card chu a neitu tur te neih tir vek a ni tawh a. Har Ghar Jal saturation – Tui thianghlim, ei leh in tur pek hna pawh Gram Panchayat 127-ah chuan zawh fel a ni tawh bawk a. ODF Plus model in a phut ang pawh Gram Panchayat 167 chuan an tihlawhtling tawh a, Gram Panchayat 49-in ram chungchang felfai taka computer hmanga chhinchhiah hna an thawk zo tawh a. My Bharat Volunteer atan mi 13096 inziaklut tawh bawk a ni.

VBSY program hmanna ah te hian he program kaihhnawih a thawk tha Hmeichhia 1057 hnenah chawimawina hrang hrang pek niin zirlaite 857 chawimawi an ni tawh a, tualchhung infiamna mi 266 leh Tualchhung artist-te zingah mi 46 te chawimawina pek an ni tawh bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar