Sipai bang te tan Mizoram State Cancer Institute, Aizawl nen thawhhona thuthlung ziah a ni

Mizoram a Ex-Servicemen Contributory Health Scheme (ECHS) hamthatna dawngtute'n Super-Specialty Cancer Treatment an dawn theih nan Mizoram State Cancer Institute, Aizawl chu nimin khan thawhhona thuthlung (Memorandum of Understanding) an ziahpui.

Zemabawk Cancer Institute-a Thawhhona thuthlung an ziah ah hian Headquarters Eastern Command, Headquarters 101 Area Shillong leh Central Organization ECHS aiawhin Colonel Jitender Mann, Director, Regional Centre, ECHS Guwahati leh Dr. Jeremy Lalrinsanga Pautu, Director, Mizoram State Cancer Institute ten an hming an ziak a, he Memorandum ziah a nih tak avang hian Mizoram State Cancer Institute chu ECHS ah empanelled a lo ni ta a. ECHS Polyclinic, Aizawl leh ECHS Polyclinic, Lunglei atanga damlo refer te chuan an ECHS card hmangin a thlawnin Super-Specialty Cancer treatment an dawng thei tawh dawn a ni.

Ex-Servicemen Contributory Health Scheme (ECHS) hi April 10, 2023 atang Department of Ex-Servicemen Welfare, Ministry of Defence in a kalpui tan tawh a ni a. He Scheme tum bulpui ber chu Ex-Servicemen leh an chhungte tana changtlung taka damlo inenkawlna pek a ni. Chumi tih theih nan chuan India ram pum huapin ECHS Polyclinic te, Armed Forces medical facility te an nei a. Private emaw Govt. Hospital te nen thawhhona tha tak an nei bawk. Mizoram a ECHS facility enkawltu leh chak taka kalpuitu chu Station Headquarters, Aizawl a ni a, hemi Headquarters hnuaiah hian ECHS Polyclinic pahnih - ECHS Polyclinic Aizawl leh ECHS Polyclinic Lunglei te an awm a ni.

ECHS Polyclinic Aizawl leh ECHS Polyclinic Lunglei te hi Station Headquarters, Aizawl enkawlna hnuaia awm niin Mizoram a Ex-Servicemen te inenkawlna lamah thahnem ngai takin Headquarters Eastern Command leh Headquarters 101 Area Shillong te nen an thawkho reng a. He Memorandum hian Ex-Servicemen leh an chhungte inenkawlna kawnga Guwahati, Kolkata leh Delhi te an pan fo thin na kum 3 chhunga an phurrit te chu a chhawk zangkhai hle tura ngaih a ni.