Serchhip Field Veng VC by-election atan inbuatsaih mek

Serchhip Field Veng Village Council-a Seat ruak pakhat (General) hnawhkhahna atana by-election neih turah tun thla ni 10 thleng chuh tumte tan hming pekluhna hun hawn mek a ni.

Mizoram State Election Commission chuan Serchhip Field Veng VC-a Seat ruak pakhat awm hnawhkhat tura by-election neih hun atan hian tun thla ni 30 khi a ruat a, hemi chungchanga Mizoram State Election Commission thuchhuah tarlan danin inthlan hriattirna hi January 4, 2024-a tihchhuah a nih rualin Returning Officer chuan hriattirna tichuak ve nghalin, January 10, 2024 thleng inthlan chuh tur tan hming pekluh theih a ni anga. January 12, 2024-ah hming pekluh te hi enfiahin January 15, 2024 tlai dar 3:00 thleng inhnuhdawh theihna hun hawn a ni leh anga, January 30, 2024 zing dar 7:00 atanga tlai dar 4:00 thlengin mipui ten vote an thlak anga, vote tla te hi chhiar nghal tur a ni ang.

Serchhip Field Veng VC-ah hian Seat panga (5) awmin heng zinga pakhat chu hmeichhe tana hauh a ni a, VC Inthlanpui hnuhnung berah khan MNF in Seat 3 leh ZPM in Seat 2 lain MNF in sawrkar an siam a, ZPM atanga thlantlin VC Member pakhat chu a boral avangin General Seat pakhat chu a ruak a, hemi hnawhkhat tur hian tun thla ni 30 khian inthlanna hi neih a ni dawn ta a ni.

Serchhip Field Veng VC-a by-election neih tur atana inbuatsaihna atan hian nikum July thla Electoral Roll enfiah hna thawh a lo ni tawh bawk a. Nikum July 18-a Serchhip Field Veng VC Electoral Roll tarchhuah atanga a lan danin an huamchhung ah hian In 215 awmin Vote nei thei mipa 299 leh Hmeichhia 346, an vaiin 645 an awm a. Inthlan puan a nihn rual hian he VC huamchhungah hian Model Code of Conducts puan nghal a ni bawk.

Serchhip Field Veng VC-a by-election neih a nih rual hian District 5-a VC 19 leh MADC hnuaia VC 2, CADC hnuaiah VC 2 leh AMC hnuaia Local Council 2-ah pawh inthlanna hi neih a ni ang.