Kumin January 1-a kum 18 tling chin te lain Electoral Roll ennawn hna thawh mek a ni

Kumin (2024) January 1-a kum 18 tling chin te laa Electoral Roll ennawn hna thawh tur atan Draft Electoral Roll chu tarchhuah a ni leh ta a, tun tuma Electoral Roll ennawn hi India ram Lok Sabha Inthlanpui kumin-a neih tura hman tur nia ngaih a ni.
Election Commission of India in ruahmanna a siam anga Electoral Roll ennawn hna thawh tur atan hian Inrinni khan Draft Electoral Roll hi tarchhuah niin Serchhip-ah chuan Deputy District Election Offier Lalnundika chuan Serchhip DC Meeting Hall-ah Draft Electoral Roll hi a tarchhuak a. He hunah hian Deputy District Election Officer chuan kumin January ni 1-a kum 18 tling chin te tan Electoral Roll-a inthun a theih thu leh siam that ngaite pawh siam that theih a nih thu a sawi a, mahni bialtu BLO te kaltlangin emaw, Online pawhin dilna hi a siam theih thu a sawi a. Draft Roll tihchhuah tharah hian mipa 64 leh leh hmeichhia 103 an vaiin mi 167 thun thar an ni a, chhan hrang hrang avangin mi 57 chu an paih an nih thu a sawi bawk.

He hunah hian Election Officer mawhphurhna chelh mektu Rebecca Laldinmawii Hrahsel chuan kumin Jauary 1-a kum 18 tling chin te tan Electoral Roll-a inthunthar dil theih a nih bakah hian January 22, 2024 thlengin siam that ngaite siam thatna hun hawn anih thu a sawi a, February ni 8, 2024-ah Final Electoral Roll tarchhuah a nih tur thu a sawi bawk. Kum tling tharte tana inthunna hun hi a tam loh avangin mipuiten an lo hriat zau theih nan a theih anga inhrilh hriatna nei turin kalkhawmte a chah bawk a ni.

Draft Electopral Roll atanga a lan danin Serchhip District chhunga Assembly Bial pathum a Voters awm zawng zawng zat chu 54,675 niin heng te hi mipa 26,720 leh hmeichhia 27,955 an ni a, Service Voters 413 an awm a bawk a ni. Serchhip District chhunga Assembly Bial pathum zinga vote nei tamna ber 26-Serchhip AC-ah voters 20,643 awmin an zinga 9691 hi mipa an ni a, hmeichhe 10,952 an awm bawk a. 27-Tuikum AC-a voters 16,932 awmin an zinga 8387 chu mipa niin hmeichhia 8545 an awm a, 28-Hrangturzo AC-ah voters 16,687 awmin mipa voters 8232 leh hmeichhia 8455 an ni a. Assembly Constituency pathum ah te hian hmeichhe voters an tam zawk vek a, gender ratio hi 1062 a ni.

Serchhip District chhunga Assembly Constituency pathum ah hian Polling Station 88 a awm mek a; 22-Serchhip-XII Polling Station ah vote nei mi 976 awmin voter tamna ber Polling Station a ni a, 31- Vanchengte Polling Station-ah vote nei mi 95 awmin Polling Station voter  tlemna ber a ni.

Comments

Popular News (Last 30 Days)

LPG man bithliah thar