Nikum-ah Serchhip-a END ten Zu leh ruihhlo man tam
Serchhip-a Excise & Narcotics Department hotute hnen atanga LENKAWL in thu a dawn danin nikum (2023) chhung khan Serchhip-a Excise & Narcotics Department chuan Heroin kg. 3.660 an man a, hei hi kum khat chhunga Heroin an man tam ber pawl niin Ganja pawh kg. 2.22 an man bawk a. Ruihhlo an man kaihhnawih ah hian ND&PS Act hnuaiah thubuai 55 ziahluh a ni a, mi 72 manin heng zinga mi pahnih te erawh man nawn niin mihring man zawng zawng erawh 70 an ni thung.
Nikum chhung vek khan Serchhip-a Excise & Narcotics Department hian rakzu litre 4556.3 manin Zu bilhlai Tin 777 an man bawk a, Sapzu (IMFL) pawh um puitling 194 lai manin Champwine litre 16.65 an man a, Beer canned (500ml) pawh 29 an man bakah Dawidim kg. 2.8 an man bawk a. Zu siamna atana hman Bel pawh 43 zet an man bawk a ni. Hemi hun chhung vek hian Zu leh ruihtheih thil kaihhnawih ah lirthei ke hnih nei chi 3 manin LMV 6 leh Auto Rickshaw pakhat an man bawk a ni. Nikum chhung khan MLP Act hnuaiah Serchhip-a Excise & Narcotics Department hian thubuai 305 ziaklutin mi 290 an man bawk a. Heng Zu leh ruihhlo kaihhnawiha thubuai an ziahluh te hi Court-a ngaihtuah a nih hnuah thubuai engemaw zat chu chinfel a ni tawh thung a ni.
Serchhip-a Excise & Narcotics Department hian nikum chhung khan Chhiah hrang hrang Rs. 19,93,314/- zet an hmu bawk a, heng zinga a tam ber Rs. 16,99,614/- hi Foreign Liquor leh Spirit hnuaia hmuh niin heng te hi Sipai ten Zu an lakluh atanga Chhiah an pek a ni ber tih kan thudawnna chuan a sawi a. Hei bakah hian Fines & Confiscation hnuaiah Rs. 2,93,700/- hmuh a ni bawk.
Comments
Post a Comment