Champhai District Police te chawimawina hlan

Election Commission of India chuan Champhai District Police te hnenah inthlan vuakveta venhimna an kalpui that avangin chawimawina an hlan.

Mizoram Police thuchhuahin a tarlan danin Champhai District Police ten inthlan hunlaia venhimna an kalpui that avangin Award for Examplary Electoral Practice in Security Management hlan an ni a. Inthlanna ralmuang, felfai leh him neih theihna tura an hmalakna bakah vote thlakna hmun venhim uluk zual ngaite a awm chunga Assembly bial hrang hranga vote thlaktu an pun theih avangin he chawimawina hi pek an ni.

Champhai hi Myanmar ramri bula awm a nih avangin Myanmar ram buaiah chona hrang hrang an hmachhawn a. Heti chung hian inthlan kaihhnawihah khan venhimna tha taka kalpuiin ramri hnaih khuaa mite tan nasa takin an thawk a. Inthlanna felfai nei thei tur hian ruihhlo leh zu, cheng vaibelchhe 12.5 hu vel an man chhuak bawk a ni.