Budget-ah Chapchar Kut sum

Chief Minister leh Chapchar Kut Organising Committee Chairman Lalduhoma chuan Chapchar Kut hmanna tur sum hi sawrkar Budget-ah dah a ni ngai lo tih nimin-a Chapchar Kut hman dan tur rela thutkhawm CM Conference Hall-a neih ah sawiin, kumtin-a kan hman thin, kan ni pawi-mawh a nih avangin nakum atang chuan sawrkar budget-a dah a nih tawh tur thu a sawi bawk. Nimin-a Chapchar Kut Organising Committee thukhawm hian Chapchar Kut hi kumin-ah ni khat hman nise tiin Chapchar Kut hmanna tur sum, District leh Mizoram House a sem darh dan tur te siamfel a ni a. Kut Pa leh Kut Thlengtu tur ruatin, Kut thupui (theme) atan ‘Zonun Zemawi - Tlawmngaihna’ tih chu thlan a ni. He thutkhawm ah hian Sub-Committee din tul awm te leh Souvenir Editorial Board te an din a, Department dangte nena thawhhona (convergence) awm thei te, Exhibition buatsaih dan tur te, Food Court buatsaih theih dan tur te leh thil pawimawh dang te an ngaihtuah a ni.