Bill tang buaipui mek zel

Mizoram Sawrkar tharin Healthcare Bill tang pek tur cheng vbc. 40 a ruahman chu Finance Department lamah a la thang mek ni a thudawn a ni.

Thudawn danin, Mizoram sawrkarin Healthcare bill mipui hnen a pekchhuah tur cheng vbc. 40 a ruahman tawh chu dan angin Finance Department ah tih fel ngai te a tihfel mek a ni a, chumi hnu-ah bill hi pek chhuah a ni ang. Mizoram State Healthcare Society thawktute sawi danin, tun dinhmun a Healthcare bill pek chhuah tur an passed zat chu cheng vbc. 57 a ni a, heng bakah hian bill tang tlem a zawng awm bawkin, bill tang zawng zawng hi cheng vbc. 60 chuang hret a nih rin a ni. 

Chief Minister Lalduhoma hovin December 11, 2023 khan Finance Department leh Planning & Programme Implementation Department hotute an thukhawm a, sawrkar policy in a huam thlai palite leina tur cheng vbc. 110 ruahmanin, Healthcare bill tang pek tur cheng vbc. 40 an ruahman bawk a ni.