Art & Culture Minister in Chapchar Kut sawipui

Art & Culture Minister C. Lalsawivunga chuan nimin khan Central YMA hruaitute a Pisa a leng-ah sawmin Chapchar Kut lawm dan tur leh pawimawh dangte a sawipui.

Minister Pisa-a an inkawmna ah hian Art & Culture Minister chuan Chapchar Kut hman dan tur chungchang Department hotute nena sawihona hmasa neih a nih tawh thu sawiin, hlawhtling taka Kut lawm a nih theih nana sawrkar kutke pawimawh tak YMA hotute nena inrawnkhawma neih a ni chu lawmawm a tih thu a sawi a. Kalkhawmte chu tun aia hmasawn leh hlawk zawka Kut lawm a nih theihna tura ngaihtuahna seng turin a chah a. Hnam inpumkhatna leh hnam ziarangte chawisan a nih theih nana hmalak tlan a pawimawh thu a sawi bawk.

He hunah hian Chapchar Kut hman tawh thin dante aia tha zawk leh hmasawn ngaihna te, hnam ziarang leh nunphungte zau zawka pho-chhuah a nih theih nana hmalak tul te, sum leh pai neih angte awmze nei leh inrenchem taka hman a tul thu te, mipuite'n hlawk leh tangkai zawka Kut an lawm theih nana pawimawh leh tul dangte zau taka sawiho a ni a. Rawtna leh pawimawh an tihte chu Chief Minister kaihhruai Chapchar Kut Organising Committee thut-khawm neih huna pawmpui tura chhawpchhuah ni se tih a ni bawk.