Kum 2022 aiin 2023-ah Mizoram-ah ruahtui tla tlem mahse ruahtui tla erawh a tha thawhkhat

Kum kalta 2023-ah khan Mizoram-ah ruahtui mm 1972.8 tlain kum 2022-ah mm 2015.1 a tla a. Nikum a ruahtui tla hian kum 2022-a tla zat a pha lo mah se ruahtui a tla tha thawkhat nia chhut a ni.

Khawchin leh sik leh sa chhinchhiahna State Meteorological Centre-in an chhinchhiah danin nikum-ah khan January leh February-ah ruahtui tla awm lovin March thla ah a tla tan a, nikum-a ruahtui tla hmasa ber hi March 16-ah a tla nia chhinchhiah niin kum tluanin ruahtui mm 1972.8 a tla nia chhinchhiah a ni a, nikum kha tunhnai kum nga chhunga Mizoram-a ruahtui tam ber dawttu kum niin kum 2019-ah mm 1518.2 a tla a, kum 2020-ah mm 1741.5 tlain kum 2021-ah mm 1917.6 a tla a. Nikum hmasa 2022 kha kum 5 kalta chhunga ruahtui tlak tam ber kum niin mm 2015.1 a tla nia chhinchhiah a ni bawk. Directorate of Science and Technology enkawl State Meteorological Centre-in an chhinchhiah chinah kum 2017 kha ruahtui tam ber kum niin khami kum khan ruahtui mm 2686.7 a tla a ni. Hemi kum vek hi chhinchhiah chin ah khaw lum ni ber leh khaw vawh ber ni a ni bawk a, chhinchhiah china khaw vawh ber tum chu January ni 13, 2017 kha niin 2.7°C a ni a, a lum ber tum chu April ni 13, 2017 niin 36.5°C a ni bawk.

Directorate of Science & Technology-a State Meteorological Centre hotute chuan, Mizoram bika chhinchhiah a nih chinah khaw vawh dan leh lum dan a zual zel rualin kumtina khaw awmdan chawhrualin danglamna em em a awm lo tih an sawi a. Kum 1985 atanga 2023 thlenga chhinchhiah a nih danin, kum 1995 chu khaw lum ber tum niin, chawhrualin 23.6°C a lum a ni a. Kum 2016 chu khaw vawh ber tum niin chawhrualin 18.7°C-a vawt a ni.

Mizoram puma khaw lum leh vawh dan tehnaa rin leh pawm ber chu New Capital Complex (MINECO) a khaw lum leh vawt tehna khawl niin, District hrang hranga an khawl neih chu enkawltu tur an awm loh avangin hman a ni ngai lo nia thudawn a ni ai. Hmun khat ami chauh hman a nih avang hian Mizoram hmun hrang hranga awmte tan khaw chin tehna hi a dik diak diak vek lem loa ngaih a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man