Vote chhiar hun sawn a nih avangin lawmthu sawi

Mizoram-a Tlawmngai pawl hrang hrang intelkhawm NGO Coordination Committee chuan Mizoram MLA inthlanpui vote chhiar hun sawn anih avangin lawmthu an sawi.

NGO Coordination Committee hian Inrinni khan Tuikhuahtlang-a Central YMA Committee Room-ah Vote chhiar hun sawn a nih avanga lawmthu sawina atan thuthar lakhawmtute an kawm a, NGO Coordination Committee Chairman leh Central YMA President, Lalhmachhuana chuan, Election Commission-in vote chhiar ni atana December ni 3, Pathianni a ruat chu sawn turin mihring lamin an tih theih ang zawng zawng chu an ti niin a sawi a, vote chhiar ni sawn tura an hmalakna ah tharum thawhna lam hawia chet tumna an neih loh thu a sawi a. “Vote chhiar hun sawn tur hian Kohhran, Political party, NGO leh mimal thahnemngai ten theihtawp an chhuah a. Kan beidawn rum rum hnuah Pathian vangin a hlawhtlinna kan hmu a. Vote chhiar hun sawn anih theihna atana hma latu zawng zawng te chungah lawmthu kan sawi a ni,” a ti. 

Central YMA President Lalhmachhuana chuan, Social Media velah Pathianni chiah ngaipawimawh anga puhna a awm chu thu dik lo a nih thu a sawi a, Sabbath ni leh Pathianni a vote chhiar loh ni se tih chu a tir atanga an tanna a nih thu sawiin, Pathianin finna a pek avanga a tawp thlenga an tanna chu Pathian in mal a sawm ni-a a hriat thu leh an hmalakna MKHC leh Mizoram mipuiin an thlawpnaah lawmthu a sawi a, Election Commission hnenah pawh lawmthu sawina lehkha thawn an tum thu a sawi bawk.

He hunah hian NGOCC Secretary leh Central YMA General Secretary Prof. Malsawmliana pawhin, “Kan hmalakna ah hian beidawn rum rum chang te pawh kan nei a. A tir atangin kan hmalakna ah hian tharum tel lo (non violence) tih chu kan thupui a ni a, hetia a hlawhtlinna kan hmu ta hi lawmawm kan ti takzet a ni,” a ti a. Vote chhiar hun sawn anih avanga lawmthu sawina hi Election Commission of India leh Mizo mipuite ah thuchhuah siama puanzar an tum tih a sawi bawk.

NGOCC member leh MZP President ni bawk H.Lalthianghlima pawhin an duhdan tihhlawhtlin anih chhan chu mipuite tawngtaina Pathian in a chhan vang tih a sawi a. Mizoram Upa Pawl President Nghaklianmawia pawhin, “ECI thuchhuak chu Mizo mipuite tan hlimna ni a ni,” tiin a hun takah Pathian a che niin a sawi bawk.

Hetihlai hian Mizoram Kohhran Hruaitute Committee (MKH)C Chairman, Synod Moderator Rev. Dr. Chawnghmingliana pawhin inthlan vote chhiar hun sawn a ni ta chu Pathian hnena tawngtai chhanna a ni tih sawiin Mizo mipuite tawngtaina Election Commission of India kaltlangin Pathian in a chhang a ni, a ti bawk.