Design Training & Production Centre building hawng

Sawrkar laipui atanga Rashtriya Gram Swaraj Abhiyan (RGSA) kaltlanga sum hmuh cheng nuai 68 senga sak Thenzawl Handloom Design Training & Production Centre chu nimin khan Mizoram sawrkar-a LAD changtu Secretary Teressy Vanlalhruaii chuan a hawng.
Thenzawl West VC te sak building thar hawnna ah hian LAD Secretary chuan sawrkar in mipuite tan Assets tam tak a siam thu sawiin, heng te hi a enkawl zui leh humhalna ah mipui ten neitu rilru kan put a tul thu a sawi a. Sawrkar hmalakna reng reng hlawhtlinna chu sawrkar-ah ni lovin mipui-ah a awm thu sawiin, he building hawn thar tak hi VC leh Self-Help Group bakah Thenzawl mipui ten tangkai taka an hman a beisei thu a sawi bawk.

Thenzawl Vengchhak-a he building sak thar hi Sept. 9, 2022 khan sak tan niin Mizopa chhiara chhawng hnih a ni a, a Project pumpui hi cheng nuai 141.23 niin a building sakna bakah hian Handloom design zirna tur leh hemi atanga sum hmuh let theihna tur te, Khawl leina tur te leh exposure tour neihna tur te telin Thenzawl West VC ten an enkawl zui dawn a ni.