Serchhip District mipuite fimkhur turin chah

November 17 leh 18, 2023 chhunga Mizoram hmun hrang hrangah ruah sur leh thli thawk tur anga sawilawk a nih avangin Serchhip District mipuite chu fimkhur tura chah an ni.
Hemi chungchanga nimin-a Serchhip District Bawrhsap David Lalthantluanga’n thuchhuah a siama a tarlan angin India Meteorological Department-in Nov. 17-a Special Bulletin-a a tihchhuah angin Nov. 17 leh 18, 2023 chhung hian Mizoram hmun hrang hrangah ruah sur leh Thli thawk tur angin a sawi lawk tih a tarlang a. Hei vang hian Serchhip District mipuite chu fimkhur tura chahin, Chhiatna a lo thlenin Serchhip District Emergency Operation Centre, Phone No. 9862116104, 1077 (Toll Free)-ah te engtik lai pawha biak theih a nih thu a tarlang a. Heng bakah hian Inkaihhruaina zawm tur hrang hrang tarlang bawkin, In leh lo leimin leh chhiatna thleng thei laka fimkhur tur leh tui hmun leh ramhnuai-a kal loh a that thu te pawh a tarlang bawk a ni.