Serchhip-ah Energy Club Teacher Incharge ten training nei

Power and Electricity Department hnuaia Electrical Inspectorate, State Designated Agency for Energy Conservation buatsaihin nimin khan Serchhip-a I&PR Conference Hall-ah Serchhip District chhung zirna In hrang hrang thlanchhuah a Energy Club Teacher Incharge te tan training buatsaih a ni.
He training hi P&E Department-a Chief Electrical Inspector Er. R. Romawia chuan kaihruaiin P&E Department-a Project Coordinator Vansangliana chuan he huna kalkhawmte zirtirna a pe a, kan nitin khawsakna kawng hrang hrangah Energy kan mamawh thu sawiin, Mizoram-ah chuan Nizung chakna leh Tui chu kawlphetha kan hmuhna awmchhun a ni ber tih a sawi a. Mizoram in kawlphetha kan mamawh chu ni khat ah a tam lai berin MW 120 vel a nih thu leh heng zinga MW 56.85 chu Mizoram in kan tharchhuah a nih thu sawiin, MW 34.55 chu Hydel Project atanga kan tharchhuah leh a dang MW 22.3 chu Nizung chakna hmanga kan thar te a ni tih a sawi a. He hmalakna hnuaia kawlphetha renchem kawnga inzirtirna nei tura ruahmanna leh an kalphung tur hrang hrangte a zirtir a ni.

Serchhip District chhungah hian zirna In 20 te chu Energy Club dinna tur hian thlan an ni a, heng zirna In te hi Energy renchemna kawnga P&E Department hmalakna puitu turte niin heng School-ah te hian zirlaite chu Club Member an ni dawn a. Heng zirna In hrang hrang te hi kawlphetha renchemna kawnga mipui zirtirna tur hmanrua chi hrang pek an nih dawn bakah pawisafai, LED Bulb leh Tube bakah hmanraw mamawh dang te pek an ni dawn a ni.

Serchhip District-a Energy Club dinna tura thlan te hi Serchhip-a Zirna In panga bakah Chhiahtlang, Keitum leh Thenzawl-ah pahnih theuh leh East Lungdar, Mualcheng, Bungtlang, Baktawng, Lungchhuan, Khawlailung, Chhingchhip, North Vanlaiphai leh Hualtu-ah zirna In pakhat theuh te an ni.

Comments

Popular News (Last 30 Days)

LPG man bithliah thar