Mizo thalaite tan Healthcare Sector-ah hlawh tha tak neiin hnathawh tur tam tak a awm - Governor

Mizoram Governor Dr. Hari Babu Kambhampati chuan Mizo thalaite tan ram pawn leh India ram chhungah Healthcare Sector-ah hlawh tha tak neiin hnathawh tur tam tak a awm mek tih a sawi a. Hetiang lamah hian kan thalai ten hnathawh an in tihhmuh a hun hle tih a sawi bawk.

Mission Foundation Movement (MFM) in MFM Durtlang hnuaia Geriatric Caregivers zirchhuak te Graduation Day nimin-a MFM Villa,Durtlang-a an buatsaih a hmanpuina ah Governor Dr. Hari Babu Kambhampati chuan MFM, Durtlang hmalakna pawimawh tak takte chu fakin hna tamna Sector hrang hranga thiamna tangkai zirtirna kawnga Mizo thalaite tana an hnathawh te chu thil lawmawm tak a ni tih a sawi a. Care Giver training chhuak mi 25 te chu a lawmpui thu sawiin, hmalam hun eng tak an nei tih a sawi a. Ram changkang tam zawkah kum upa lam an tam chhoh zel avangin kum upate enkawlna kawngah hna thawh tur a pung chak hle a, hei hi India Hmarchhak thalaite leh a bikin Mizo thalai, hawihawm leh themthiam tak tak ten-a an thiam sa leh tlem training neih hnua awlsam taka an thawh theih a nih thu a sawi a, Japan, Malaysia, Singapore leh hmundangah te pawh he hna hi mamawhna a sang tawh hle tih a sawi a ni.

Governor chuan Mizo thalaite zingah Nurse leh Healthcare Professional hnathawka hmun hrang hranga awm te an pung zel tih pawh sawiin, Mizo thalaite hian an hnathawhna hmunah fak an hlawh em em a, tunah hian ram pawnah leh India ram chhungah Mizo thalaite tan Healthcare Sector-ah hlawh tha tak neiin hnathawh tur tam tak a awm mek tih a sawi a. Sawrkar hna a tlem em avangin mi zawng zawng tan sawrkarah hna thawh tur a awm tam tawk bawk si loa, hetiang lama kan thalaiten hnathawh an intihhmuh hi a hun hle tih a sawi bawk a ni.

Nimin-a Mission Foundation Movement (MFM) Geriatric Caregivers-te Graduation Ceremony neih hi Mission Foundation Movement (MFM) Director R. Vanlalzauva chuan khualtha te chawimawina thilpek hlana bul tanin MFM Chairman Lalthangmawia chuan an kalphung leh hnathawh dan hrang hrangte a sawi a. Hemi hnu hian Governor hnen atang hian thla thum (3) chhung course zir chhuak, Care giver Training Batch hmasa ber mi 25 te hnenah Governor hian Certificate hlanin Governor hian thu a sawi bakah MFM School of Nursing-a Principal Christina Zothanpuii chuan lawmthu sawiin hun a hmang bawk a ni.