Scho pekchhuah phutin MSB Pisa kai tur dan tum

Mizo Zirlai Pawl (MZP) hmalakna Zirlaite hnena Scholarship pechhuak thuai tura sawrkar nawrna kal zelah Vawiin atang hian Mizoram Scholarship Board-a thawktute Pisa kai tur dan tum a ni.

Nimin khan MZP General Hqrs. hmalakna in Zirlaite Scholarship 2nd Installment pekchhuah har vanga lungawi lohna lantir nan leh Scholarship sum pekchhuah vat phuta punkhawm chu Aizawl-a Mizoram Scholarship Board Office tual-ah neih leh a ni a, he hunah hian MZP General Hqrs. President H. Lalthianghlima chuan Scholarship Board in an tih tur an tih tawk loh avangin tun dinmun hi thleng an ni tih sawiin, “Screening Committee vawi li an thut hnu-ah, a vawi lina-ah chauh Scholarship chungchang ngaihtuah a ni pawh hi Scholarship hotute inthlahdah vangah kan ngai,” a ti a. September 25, 2023 khan Scholarship Second installment tur pawisa Mizoram sawrkarin a dawng tawh tih sawiin, rei tak bawhzui lohin a awm thu leh MSB Secretary leh Under Secretary te chuan an tih tur an ti tawk lo nia a hriat thu a sawi a, “Scholarship sum hi September 25 khan Mizoram sum bawm-ah a lut a, Noevmber 3 thleng hun kan pe a, November 3 hma zawng khan Scholarship file hi a che lo reng reng a, a awm tawp mai a ni, hetiang khawp hian zirlaite hi min ngaihthah a ni,” a ti a. “Hetiang buaina hi nakum-ah a awm leh a nih chuan MSB hi luhchhuah a ngai a nih chuan kan luhchhuah tawh ang,” a ti bawk.

MZP General Hqrs. hruaitute hian nimin chawhnu lam khan Chief Secretary Dr. Renu Sharma chu a Pisa-ah hmuin zirlaite harsatna leh Scholarship pekchhuah vat a tul thu an sawipui a. Scholarship sum pekchhuah phuta punkhawm hi Vawiin-ah pawh chhunzawm tur niin nimin chawhnu khan MZP leh zirlai pawl hrang hrang aiawhte inhmukhawmin a rel angin Vawiin atang chuan MSB Office kal tur dan tum a ni.