CNDF ten Tuibual khuaa Myanmar Sipai Camp lain Myanmar Sipai 29 te Mizoram-ah an rawn lut

Chin National Defence Force (CNDF)-te chuan nimin zing dar 4:00 vel khan Vaphai khua atanga khaw chhaklam, Myanmar ramchhunga awm Tuibual khua a Myanmar Sipai Camp an la leh a, he Camp-a awm Myanmar sipai mi 29 te chu nimin khan Mizoram-ah an rawn tlanlut.

Tuipuiral YMA Group President Pu T. Lalramenga sawi danin CNDF mite hian nizan hmasa zanlai vel atang khan Tuibual-a Myanmar sipai awmhmun hi an kap tan a, Myanmar Sipai te hian an tang thei reng dawn lo tih hria-in an Camp hi rauhsanin Mizoram an pan a, Assam Rifles kuta inhumhim an tum niin an sawi a. Dungtlang Police Station atanga Mizoram Police kalte chuan Saikhumphai bul Tiau lui-ah lo dawngsawng a, Assam Rifles kuta pek tura ruahmanna siam a ni. Vaphai Branch YMA Vice President leh Vaphai-a Raltlan Committee Vice Chairman Zadingpuia te sawi danin CNDF-te chuan Tiau lui chhak, Tuibual khuaa Myanmar Sipai Camp hi an la fel tawh a, he hmuna in awmte pawh CNDF te’n an hal sak nghal vek a ni. Myanmar sipai rawn tlanlut mi 29 te hi Police leh Assam Rifles bakah Vaphai VC leh YMA hruaitute chu lo dawngsawng turin Saikhumphai-ah an lo awm a ni.

He inkahna avang hian Tuibual bul, Leilet khaw mipuite pawh sahimna zawngin, chhungkaw 63-a mi 600 vel chu Vaphai leh Saikhumphai-ah an rawn lut tawh bawk a, khaw thenawm atang pawhin raltlan hi rawn awm belh zel turah an ngaih thu Vaphai khawtlang hruaitute chuan an sawi bawk a ni.

Tarlan tawh angin Pathianni thimhlim atanga Kachin Independent Army (KIA), Chin National Army (CNA) leh Chin Defence Force (CDF) tangrualte’n Champhai District a Zokhawthar chhak mai Khawmawi leh Rihkhawdar-a Myanmar sipai Camp lak tuma beiin zankhua leh a tuk nileng deuhthaw-a an inkah hnuah Camp pahnih hi lak a ni a. Khawmawi Camp atanga Sipai tlanchhia mi 42-te hi Mizoram-ah lo lutin Zokhawthar Police-in Ministry of Home Affairs thu angin Assam Rifles kutah an hlan a. Champhai lamah hruaiin Hnahlan thlenpui an nih hnuah Indian Air Force Helicopter-in Mizoram atanga phurhchhuah an ni. Thudawn danin Myanmar Chin State a Mizoram hnaih lamah tunah chuan Myanmar Sipai camp a awm tawh lova, mipui tangrual sipai invuahte hian an la fai vek tawh a ni.

Comments

Popular News (Last 30 Days)

Vawiin-ah HSSLC Exam result