Postal Ballot inhlantawnna hun hman a ni

Karleh mai-a Assembly Inthlanpui lo awm tur atan Official-te tana Postal Ballot hmanga vote thlak dilna leh vote thlakna tur Pre-Polled Postal Ballot Paper inhlantawnna hun ‘Exchange of Postal Ballot Papers’ chu nimin khan District hrang hrang 11 te'n an nei.

CEO Mizoram Office hmalakna a ‘Exchange of Postal Ballot Papers’ hi Mizoram Legislative Assembly House Annexe Conference Hall-ah Addl. Chief Electoral Officer H. Lianzela hovin neih a ni a, he hunah hian Addl. CEO chuan Election Commission of India duhdan angin mipuite rinngam leh innghahna tlak ni tura langtlang leh him taka election buaipui a pawimawh thu sawiin, mawhphurhna theuhte tha taka hlen tura theihtawp chhuahho zel a tul thu a sawi a. Postal Ballot hmanga vote thlak chu ngaihpawimawh a nih thu leh hemi kaltlanga hmalakna te fimkhur taka kalpui a tul thu sawiin, langtlang leh rinna nghah ngam a nih theih nan Political party-te hriatpuina leh Security-te venhimna hnuaiah uluk taka Postal Ballot Paper inhlantawnna hi neih thin a nih thu sawiin, tihsual palh leh hmaih palh a awm loh nana fimkhur tlan a pawimawh thu a sawi bawk.

Mizoram Inthlanpui-a Vote thlak ni, Nov. 7 chu Dry Day-ah Sawrkarin a puan thu Addl. CEO chuan sawiin, hei hi zawma zu leh ruihhlo dangte chelek lo turin mipuite a ngen a. Polling Area-ah rui buai an awm loh nan te, vote thlak tibuai leh tikhaihlak zawnga chetlakna a awm loh nana inzirtirna nei tam tura he huna tel te chu chahin, boruak muanawm tak hnuaiah tlai dar 4:00-a vote thlak zawhfel hman a nih theih nana mipuite zirtirna pe tam deuh deuh turin a chah bawk. Hei bakah hian November ni 5, 2023 (Pathianni) tlai dar 4:00 atangin inthlan kaihhnawih campaign lam hawi hrim hrim khap a nih tawh dawn thu leh Silent Period hman tan a nih dawn thu a sawi a. Campaigner zawng zawngte'n an vote neihna hmun an pan a ngaih tawh dawn thu leh Electronic Media kaltlanga politics kaihhnawih chhuah phal a nih tawh dawn loh thu a sawi a. Print Media tan silent period bikah Political Advertisement chhuah tura MCMC ah dilna thlen hmasak a tul tawh dawn thu a tarlang bawk.

Deputy CEO R.Vanrengpuia kaihhruai he hunah hian District hrang hrangte'n Form 12, Form 12D leh vote thlakna tur Pre-Polled Postal Ballot Paper inhlantawnna hun a tahtawl zelin an nei a. Inthlan kaihhnawih duty-te bakah Essential Services duty tur mahni veng/khua a vote thlak hman lote chuan Form 12 leh 12D hmangin Vote thlak an dil a, nimin-a he hun hman ah hian dilna form leh vote thlakna tur Postal Ballot-te inhlan niinDistrict hrang hranga Postal Ballot buaipuitute bakah Political party aiawhte leh Security personnel-te an tel a. Hemi hnu hian khawmuang lovin venhimna khauh tak hnuaiah mahni District theuh an pan nghal a ni.