Candidate zingah Doctorate Degree nei 12 awm

Tun thla ni 7-a Mizoram Assembly Inthlanpui lo awm tur chuhtu mi 174 zinga Candidate 12 chu Doctorate Degree nei an ni a, Candidate zingah ziak leh chhiar thiam lo mi pakhat a awm thung.

Delhi a hmunpui nei, Association for Democratic Reforms (ADR) leh Mizoram Election Watch (MEW)-te’n an tarlan danin Mizoram Assembly Inthlanpui neih turah hian Candidate 174 zingah ziak leh chhiar thiam lo pakhat awmin, pawl 5 pass 3, pawl 8 pass 10, Matric pass 12 an awm a. Pawl 12 pass 18, Graduate 53 leh Graduate Professional 18 an awm a. Post Graduate 45 bakah Doctorate Degree nei 12 leh Diploma 2 an awm a ni. Candidate zingah mi 19 chu kum 31 leh 40 inkar an ni a, kum 41 leh 50 inkar Candidate tam berin mi 60 lai an tling a. Kum 51 atang 60 pawh mi 45 an awm a, kum 61 leh 70 inkar a upa mi 42 an awm bakah kum 71 leh 80 inkar mi 8 an awm bawk a ni.

Candidate zinga upa ber chu Tuichang bial-a MNF candidate Tawnluia niin kum 80 a upa a ni a. Aizawl East-I a MNF Candidate Zoramthanga’n dawtin kum 79 a ni a, a pathumna chu kum 77 a upa Aizawl West-III a INC Candidate Lalsawta a ni a. A palina chu Aizawl North-I biala MNF Candidate R. Lalzirliana niin a pangana chu Aizawl North-III biala INC Candidate Lal Thanzara a ni.

Candidate zinga naupang ber chu Aizawl East-I biala Independent a ding Lalruatfeli Hlawndo leh Tuirial biala BJP Candidate F. Vanhming-thanga te an ni a; anni pahnih hi kum 31 a upa ve ve an ni a. Aizawl South-III biala a ZPM Candidate Baryl Vanneihsangi leh South Tuipui bial a ZPM Candidate Jeje Lalpekhlua te chu kum 32 ve ve an nih bakah Aizawl West-III a Independent candidate Lalhrilzeli Hlawndo chu kum 33 a upa a ni bawk.

Comments

Popular News (Last 30 Days)

LPG man bithliah thar