MNF hian sawrkarna kan lak leh ka ring - Ruatkima

MNF Adviser Lalruatkima chuan MNF in sawrkarna an lak leh a ring tlat tih sawiin, “Hnehna kan chang a nih chuan mipuite hnenah lawmthu sawi hi kan tih tur hmasa ber a ni ang,” a ti.

Nimin a Aizawl Mizo Hnam Run-a Chhung Inkhawm neih ah Lalruatkima chuan Inthlan buaipuitu zawng zawng- Election Officials te, MPF, Kohhran, Tlawmngai pawl leh venhimna hna thawktu Police zawng zawngte inpekna lawmawm a tih thu sawiin, “Mizoram mipuiin inthlanna felfai kan kalpui thei a ni tih lantira a awm kha a ropui ka ti bawk,” a ti a. Mizoram-ah Inthlan zawh hnua thawhhona (Post poll Alliance) hi dinchawp ngaiin a la thleng ngai lo tih sawiin, “Mizoram-ah Sawrkar inthlak a awm apiangin party Leader te an dinnaah an tla thin. Kan Leader Pu Zoramthanga hi a tlin loh hlauhna nei tumah an awm lo,” a ti a. “He ram leh hnam tan hmachhawp hrang hrang kan neihte a hlawhthin theih nan Pathian in hun tha min pe anga, Zoram mipuiin hun min pe leh anga, sawrkarna kan chang leh ngei ang,” a ti.

Inthlan zo in a tute pawhin beiseina sang tak nen inthlan result kan nghak mek tih Lalruatkima chuan sawiin, Khawthlang lam leh chhim lam bial, Minority te tamna bial 10-ah hian bial 5 aia tlem lo MNF in lak a beisei thu sawiin, “Kan lak bang hi Congress leh BJP in an lak a rinawm a. Kan lak ngai lohna bial-ah kutzungtang kan thliak thei tawh dawn a, kan chak a rinawm. ZPM hian bial 30 la awm atangin majority an lak phak hi a rinawm lo a ni,” a ti bawk.

Comments

Popular News (Last 30 Days)

Vawiin-ah HSSLC Exam result