Mizoram pumah Assembly Inthlanpui neih niin Vote za zela 77.83 vel a tla nia chhut a ni

Mizoram Legislative Assembly Inthlanpui chu nimin khan Mizoram hmun hrang hrangah tluang taka neih a ni a, khawi hmun atang mah boruak duhawm lo a thlen hriat a ni lo a. Mizoram pumah Vote za zela 77.83 vel tla anga chhinchhiah niin hei hi la pung leh hret tura beisei a ni.

Mizoram Assembly dinglai aterm kal mek kumin December thla ah a tawp dawn tak avanga Inthlanpui chu nimin khan Mizoram hmun hrang hranga Assembly Bial 40-ah tluang taka neih a ni a, mipuite tan zing dar 7:00-ah Vote thlak tan theih niin Polling Station thenkhat ah khawl lama harsatna avanga Vote thlak bul tan theih loh te awm mah se Vote thlak hun sawn ngai khawpa harsatna thleng awm lovin tluang takin mipui ten Vote hi an thlak a ni. Nimin a Assembly Inthlanpui ah hian Mizoram hmun hrang hrangah Vote a tla tha thawkhat nia thudawn a ni a, hmun thenkhat ah report la tihfel theih chiah loh te a awm chungin nizan dar 9:00 thleng khan Vote tla hi za zela 77.83 a tling tawh a, heng ah hian Postal Ballot te chhiar tel ala nih loh avangin Vote tla zat hi la pung leh tura beisei a ni.

Hriat theih chinah nizan dar 9:00 thlenga khan Mizoram District hrang hrangah Serchhip District chu Vote tlak thatna ber niin Vote za zela 84.78 vel a tla nia chhinchhiah a ni a, Hnahthial District-ah 84.16 a tla a, Saitual District-ah Vote za zela 80.74 tlain Aizawl District-ah 77.47% a tla ni chhinchhiah a ni bawk a. Kolasib District-ah Vote za zela 81.75 vel a tla nia chhinchhiah a ni a. Mamit District-ah za zela 84.32 tlain Lunglei District-ah za zela 81.67 zel a tla a. Lawngtlai District-ah za zela 78.73 tlain Siaha District-ah za zela 76.26 a tla a. Khawzawl District-ah tlai dar 4:00 thlengin Vote za zela 82.39 tlain Champhai District-ah za zela 78.18 a tla bawk a ni.

Mizoram Chief Electoral Officer (CEO) Madhup Vyas chuan Mizoram pumah tluang taka vote thlak a ni chu lawmawm a tih thu a sawi a, Mizoram inthlan chu chhiatna lian tham thleng leh buaina tello in tluang taka zawhfel a ni tih sawiin, tun dinhmunah vote thlak zawng zawng zat hriat theih chiah la nilo mahse hun reilote ah hriat theih anih a beisei tih a sawi a. Inthlan buatsaih chhung zawngin tlawmngai pawl hrang hrang leh Mizoram People’s Forum te thawhhona chu lawmawm a tih thu sawiin, vote thlak zawng zawng chungah lawmthu a sawi bawk.

Mizoram CEO Office-a Media Cell Nodal Officer H. Lianzela pawhin tun tum inthlan vote thlak ni-a Media lama an thawhpui zawng zawngte chu CEO Office-a Media Cell-a mite thawhpuina leh an thu leh hla an ngaih pawimawh thinna avangin lawmthu a sawi ve bawk a. Inthlan vote thlak tawp hun atana ruat a pelh thlenga boruak muanawm leh tha tak hnuaia Inthlanpui fel fai taka neih theih a ni chu a lawmawm hle a ni, a ti a. ECI thupek leh Dan hrang hrangte zawm kawnga Election Department leh Media ten thawhhona tha tak an nei thei chu lawmawm an tih thu leh hei hian ram inrelbawlnaah pawh nghawng tha tak a neih an beisei tih a sawi bawk a ni.

Nimin-a inthlanpui ah hian a vawi khatna atan Polling Station 767-ah Video hmanga vote thlak dan en thli thlaina, Web Casting kalpui a ni a. CEO Office Aizawl-a Web Casting Control Room atangin Mizoram hmun hrang hranga Polling Station zawng zawng atanga za zela 60 a vote thlak dan hi thlithlai reng a ni a. Hei bakah hian Aizawl CEO Office tho a State Data Centre-ah District hrang hrang atanga vote tlak dan lut te lo lakkhawm niin mipuite hnenah a rang thei ang bera vote tlak dan puanzar a nih theihna turin ruahmanna siam a ni bawk a, Polling Station hrang hranga Sector Officer te chetvel dan pawh thlithlai reng niin hei hian EVM khawl chhia leh rokhawlhna a awm thuta rang tak a hmalakna kawngah a pui bawk a ni.