Party hrang hrang hruaitu ten Inthlanpui ah hnehna an chan ngei an beisei thu an sawi

Mizoram-a Political Party hrang hrang hruaitute chuan nimin-a Assembly Inthlanpui neih ah sawrkar thar an siam ngei an beisei thu an sawi hlawm.

Nimin-a Vote thlak zawh hnua thuthar thehdarhtu ten an kawmna ah MNF President leh Chief Minister nilai Zoramthanga chuan Party mal-a sawrkarna siam ngei an in beisei tih sawiin, Zohnahthlak unau hmun hrang hranga awm te MNF Sawrkar hnuaiah an thlamuang tih a sawi a, Zofa inpumkhatna atana MNF hnathawh chu an tlinna tur atana kawng pawimawh tak ani tih sawiin, Zoram mipui zawng zawng ten MNF hnathawh an hria tih a sawi bawk. MNF President chuan Myanmar atanga raltlan te tana chenna tur hmun ngaihtuah zel an tum tih sawiin, Myanmar lama remna a awm theih nan Sawrkar laipui hmalakna a awm theih nan theihtawp chhuah zel a tum tih a sawi a, tun dinhmunah remna chu thil pawimawh ber a ni tih a sawi. MNF President Zoramthanga chuan kum 2018-a a khingpuite ni lo Candidate thar a hmachhawn chungchang sawiin, a huphurhloh thu a sawi a, party dang atangin Candidate liam tham an rawn dah a rin laiin te tham deuh an dah a ti a, tlin ngei a inring tih a sawi a. Hripui leng leh harsatna tam tak an tawk chungin hnathawh nasa tak an nei tih sawiin, MNF hnathawh an mipuiin an hria tih a sawi a, Zofa inpumkhatna kawnga an hmalakna pawh an tlin chhan tur kawng pawimawh tak a ni tih a sawi bawk.

ZPM Leader Lalduhoma chuan nimin khan Serchhip Bial chhunga Polling Station hrang hrangte tlawhin, mipuite thlawpna tha tak an hmuh thu a sawi a. State pum huapa an dinhmun a tha tih sawiin, party mal-a sawrkar an siam ngei a beisei thu a sawi a. Kum 2018 leh kumin a inthlan ah danglamna tam tak a awm tih sawiin, kum 2018 aiin chak theihna an neih san zawk thu leh sawrkarna siam turin an tlin zawh ngei a beisei tih a sawi a. Mipui ten sawrkar thar hmel hmuh an chak nia sawiin, Serchhip Bial mai ni lovin hmun hrang hranga an Candidate te a biakna atangin sawrkar ngelnghet tak an siam ngei dawn nia a hriat thu a sawi bawk.

MPCC President Lalsawta pawhin an Party in sawrkar an siam ngei a rin thu thuthar thehdarhtu ten an kawmna ah sawiin, Congress chu an that vang emaw, mi in an duh vang emaw ni lovin Kohhran mipui ten tul an tih avanga Congress chu an Vote ngei a rin thu a sawi a. An sawrkar a nih chuan an manifesto an ngaihpawimawh hmasak tur thu leh kumin inthlanpui chu kil thum atanga inbeihna a nih avanga kum dang nen a inan loh thu a sawi bawk.

Bharatiya Janata Party's (BJP) Mizoram State President Vanlalhmuaka pawhin tun tum Inthlanpuiah BJP ten Seat engemawzat an lak a beisei thu a sawi bawk a. Tun tum hi Mizo mipui zingah BJP Vote tu an tam ber tum nia a rin thu leh tun ang hi a la awm a rin loh thu sawiin, BJP Vote tu te chungah lawmthu a sawi a, sawrkarna siamtu ah an tel ngei a beisei thu a sawi bawk.