Mizoram Assembly Inthlanpui neih tur atana Campaign theih hun a tawp ta

Mizoram Legislative Assembly Inthlanpui neih tur atana Campaign theih hun chu nimin tlai dar 4:00 khan a tawp ta a, naktuk zing dar 7:00 atangin mipuite tan Vote thlakna hun hawn a ni ang.

Seat 40 awmna Mizoram State Legislative Assembly Inthlanpui hi naktuk, Nov. 7, 2023 khian neih tur niin he inthlanpui atana Campaign theih hun hi nimin tlai dar 4:00 khan a tawp a, Campaign theih hun tawp hi Pathianni a nih avangin nimin lamah Vantlang huapa Campaign erawh an awm lo a, MNF Party chuan Inrinni khan Serchhip Bazar-ah Campaign kharna hun hawngin Congress Party pawhin Zirtawpni khan Thenzawl-ah Campaign kharna hun hi an hmang bawk a, ZPM party chuan Zirtawpni khan Serchhip leh Thenzawl-ah Campaign kharna hun hi an lo hmang tawh thung a. Serchhip Bial-a Independent Candidate Lalawmpuia Renthlei chuan Inrinni khan Serchhip Press Club-ah thuthar thehdarhtute kawmin Campaign kharna hun hi a hmang a ni.

Serchhip District Bawrhsap David Lalthantluanga chuan Serchhip District chhunga Assembly Bial pathum- 26-Serchhip (ST) AC, 27-Tuikum (ST) AC leh 28-Hrangturzo (ST) AC mipuite tan hriattirna tichhuakin The Representation of the People Act, 1951 Section 126 bawhzuiin Serchhip District chhungah vote thlak hun tawp atanga chhiarleta darkar 48 chu ngawih hun, 'Silence Period' ah puan a nih thu leh hei hian Nov. 5, 2023 (Pathianni) tlai dar 4:00 atanga November 7, 2023 (Thawhlehni) tlai dar 4:00 a huam thu tarlangin, hemi hun chhung hian Television (TV) emaw, Media/Social Media hmanga inthlan kaihhnawih thil tarlan leh tihchhuahte khap tlat a nih thu a tarlang a. “He hun chhung hian tumahin election kaihhnawih thila mi kohkhawm leh thusawite an ti tur a ni lova. Inthlan kaihhnawih thil Television-ah emaw, Media dangah emaw mipui hmuh theih turin an phochhuak tur a ni lo. Election thila mipui intihhlimna, ennawm leh hlimhlawpna engmah an buatsaih tur a ni lo bawk,” tiin he thupek zawm lo te chu kum hnih (2) thleng lungin tan tir emaw, lei chawitir emaw, a pahniha hrem theih an ni tih a tarlang.

Silence Period hman a nih atangin Campaign Period tawpin, mipuiten rilru fim tak leh ngaihtuahna thiang an lo neih theih nan hei hi ruahman a ni a, Political Party aiawh leh Candidates tin Campaigner-te chuan Silence Period hman a nih hnuah 26-Serchhip (ST) AC, 27-Tuikum (ST) AC leh 28-Hrangturzo (ST) AC huamchhungah vote an nei a nih loh chuan Serchhip District an chhuahsan tawh tur a ni a, hei hian Candidates, Agents leh Additional Agents te erawh a huam lo thung a. Flying Squad Team, Static Surveillance Team, etc. ten dan bawhchhiatna a awm leh awm loh an fan kual reng dawn bakah Media Certification & Monitoring Committee (MCMC) ten Media leh Social Media te pawh ngun takin an vil reng dawn bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar