Inthlanpui atan inbuatsaihna peihfel ni tawhin Polling Party 149 ten an duty-na tur hmun an pan tawh

Mizoram Chief Electoral Officer (CEO) Madhup Vyas chuan Mizoram Election Department chu Assembly inthlan lo awm tur felfai taka kalpui turin a inpeih tawh tih a sawi a. Nimin khan hmun hla zuala Duty tur Polling Party 149 te chuan an Duty-na tur hmun an pan tawh bawk a ni.

Thuthar thehdarhtu ten an kawmna ah Mizoram CEO Madhup Vyas chuan tunkar Thawhlehni a vote thlak tur atan inthlanna buaipuitu turte chu training pek vek an nih tawh thu leh an hna thawh tur pawimawh zia chiang taka hrilh an ni tawh tih a sawi a. Assembly inthlan lo awm turah Mizoram inthlanna awm tawh a vote tlak that ber tum a nih a beisei thu a sawi bawk. Inthlan felfai buatsaih tur chuan Electoral Roll tha leh dik tak a awm a ngai a, Polling Station zawng zawngah mihring mamawh, Tui, Kawlphetha, inthiarna, thutna leh Dawhkan te a awm a ngai a ni, a ti a. Hei bakah hian Electronic Voting Machine (EVM) tam tawk tak, khawl-ah harsatna a awm pawha hun khawhral lova thlak nghal zung zung theih a ngai a ni, a ti bawk. CEO chuan Mizoram-ah Polling Station ven uluk ngai 30 a awm thu leh Polling Station za zela 60-ah Webcasting tih a nih dawn thu a sawi a. Venhimna ruahmanna fel tak siam a nih thu leh harsatna awm lo thei tura ruahmanna siam a nih thu a sawi a. Election Model Code of Conduct bawhchhia a inpuhna 8 an dawn tawh thu sawiin CEO chuan, hengte hi engmah lian tham a awm lova, C-vigil hmanga chinfel an ni, a ti a. Inthlanna a vote thlak vek turin vote nei te chu a ngenin a sawm bawk a ni.

Naktuk-a Mizoram Assembly Inthlanpui neih tura hmun hla zuala Duty tur Polling Party te chuan nimin khan an Duty-na tur hmun an pan a, Election Commission of India (ECI) remtihna in Mizoram-a Polling Station 149 te chu P-2 (P minus two) ah puan niin heng te hi khaw hla deuh leh Duty te tana thlen nana hun duh rei turte niin inthlan hma ni 2 la awm ah an Duty-na tur hmun te hi pan phalsak an ni a. Heng te hi Mamit District atangin Hachhek Bial-a Polling Station 9, Dampa bial-a Polling Station 20 leh Mamit bial-a Polling Station 10 te; Lunglei District-ah Thorang bial-a Polling Station 6 leh West Tuipui bial-a Polling Station 10 te; Lawngtlai District chhungah Tuichawng bial-a Polling Station 53, Lawngtlai West Bial-a Polling Station 32 leh Lawngtlai East Bial-a Polling Station pakhat bakah Siaha District atangin Palak bial-a Polling Station 8 te an ni a. P-1 Polling Station 1127-a Duty tur Polling Party te chu Vawiin hian an chhuak ve leh dawn bawk a ni.

Additional Chief Electoral Officer H. Lianzela chuan Mizoram Assembly inthlanpui lo awm turah mipuite a tam thei ang ber vote thlak tura sawmin, inthlanna langtlang leh fel fai a nih theih nan theihtawp chhuah theuh turin mitin an sawm tih a sawi a. ECI hnuaia app leh website hrang hrang C-Vigil app te, Voter Helpline app leh Know Your Candidate (KYC) leh a dangte chu lo hmang tangkai turin leh lo en turin mipuite a chah a. Polling area a chet velna Web-Casting hmangin en theih a ni dawn tih sawiin, engkim en theih a nih dawn avangin mipuite pawh fimkhur tur leh Polling area a buaina siam lo turin a chah bawk.

Addl. CEO chuan inthlanna muanawm leh felfai tak an neih theih na’n party tin te bakah mipuite thawhho puiah a sawm a, inthlanna hmun hrang hrangah plastic leh thildang tawih thei lo te hman khap a ni tih a sawi bawk.

Naktuk-a inthlanpui neih turah hian District hrang hrangah Voter’s Information Slip sem zawh tawh a ni a. Home voting zawhfel thawkhat niin Facilitation Centre-ah Postal Ballot Paper hmanga vote thlak turte pawhin Inrinni tleng khan an thlak a. District hrang hrang ah EVM Randomisation leh Commissioning kalpui ni tawh bawkin EVM indaihlohna a awm lo tih thuneitute chuan an sawi bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man