Inthlan puan hnuah Dan lo a thil tawlhruk man tam

Mizoram Chief Electoral Officer (CEO) Madhup Vyas chuan Mizoram Assembly inthlan puan ni, October ni 9 atanga niminpiah thlengin cheng vbc. 40 chuang dan phal loh a thil tawlhruk man a nih tawh thu a sawi.

Akashvani palai nen an inkawmna ah Mizoram CEO chuan inthlan puan ni October ni 9, 2023 atanga niminpiah thleng khan cheng vbc. 40 chuang dan phalloa thil tawlhruk man a ni tih sawiin, heng hi ruihhlo te leh meizial bakah Zu leh kuhva ro te a ni tih a sawi a. CEO chuan Silent period bawhchhia complaint an dawng nual tih sawiin, lian tham erawh a awmlo a ti a, inthlan puan anih atangin Model Code of Conduct (MCC) bawhchhia emaw thil lian tham thleng complaint an dawnglo tih a sawi.

CEO chuan Polling Station awm zawng zawng zingah ni khat thil thua thleng nghal theih loh 149 a awm tih sawiin, heng zingah hian Polling Station 22 te chu ke a kal ngai a nih thu a sawi a. Hmun dang Polling Station a duty tur te chu nimin khan an chhuak tih sawiin, engkim peih fel vek a ni tih a sawi bawk.

Madhup Vyas chuan vote chhiar ni December ni 3 thlak chungchangah ECI atangin thuthar an la dawnglo tih a sawi a. August thla-a ECI hotute’n Mizoram an rawn tlawh tumin Mizoram party hrang hrang te nen an inkawmna-ah Vote chhiar hun chu Inrinni leh Pathianni-ah ni lo se tih an lo thlen tawh tih a sawi a. Mizoram Kohhran hruaitute leh tlawmngai pawl te pawhin ECI-ah ngenna amah kaltlangin an rawn thlen tih sawiin, December ni 4 emaw, ni 5-ah tal vote chhiar ni sawn turin an ngen tih a sawi a. Amaherawhchu Sstate 5 te a rual veka vote chhiar tura ECI in a ruahman avangin December ni 3 chu vote chhiar ni atan a rawn ruat tih sawiin, vote chhiar hun sawn chungchangah ECI thuchhuak ngaihchan mek a nih thu a sawi bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar