Zo United hruaitute Central YMA Office-ah an leng

Manipur-a Zofa pawl hrang hrang khaikhawm tura din Zo United hruaitute chu nimin khan Central YMA Office-ah lengin an hmalak dan te Central YMA hruaitute an sawipui. Zo United hruaitute hian Manipur tualchhung buaina avanga Zofaten harsatna an tawh chungchangah Zo United in hma an lak chhoh mek dan te sawiin, Zofa pawl hrang hrangte lungrual taka an kal thu leh inpumkhat zelna tura theihtawp an chhuah thu an sawi a. Central YMA hian Manipur tualchhung buaina a Zo United hmalakna atan cheng nuai 20 an hlan a ni. He hunah hian Central YMA President R. Lalngheta chuan Zo United hmalak chhoh dan leh Manipura Zofa unaute zingah inpum-khatna a awm zel avanga lawmawm a tih thu a sawi a. Central YMA chuan tanpui an ngaihna apiangah theihtawp an chhuah zel tur thu a sawi bawk.