Tukum Bial Zirlai Pawl Intawhkhawmna hmanpui

Tuikum Bial Zirlai Pawl Meet-2023 leh Zirlai titha te lawmpuina hun chu Inrinni khan Sel-Lut Resort, Zemabawk-ah neih niin Tuikum bialtu MLA leh SW&TA Minister Er. Lalrinawma chuan a hmanpui a ni.
Minister Er. Lalrinawma chuan zirlai kalkhawmte chu nakin lawka kan ram leh khawtlang hruaitu turte an nih avangin mahni inthununa, an tih tur leh tih loh turte hrechianga, mahni khua ah pawh zirna leh thildangah hmahruaitu ni zel a, midang tan entawn tlak ni zel turin a chah a. Mahni khua leh Veng a zirna In leh thawktute pawh an chanchin leh dinhmun hrechianga, puih an ngaihna-ah thawkhoa puitu ni zel turin leh neitu rilru pu chunga hmalak a tul thu a sawi bawk. Zirna chu hringnun laimu leh bulthut a ni tih hre tura zirlai kalkhawmte chu chahin, nakin zelah eizawnna hrang hrang an chelh hunah pawh mahni mihringpuite hlutna hriaa midang tan biak nuam leh dawr nuam ni turin a chah a. Zirlai titha bik leh chawimawi phu mi 50 lai chawimawi tur an nei chu lawmawm a tih thu sawiin, an kal zelna turah duhsakna a hlan bawk.

Tuikum Bialtu MLA Er. Lalrinawma chuan a bial chhung enkawlna ah Eizawnna, Zirna leh Hriselna chu a ngaih pawimawh zual nih thu sawiin, khaw hrang hrang mila eizawnna leh hmasawnna tura hmalakna te a kalpui thin thu a sawi a. Tunhnaiah Tuikum bial atanga School thahnem tak Mizoram sawrkarin dinhmun tha zawka a hlangkai chu lawmawm a tih thu sawiin, a enkawl zui kawngah pawh mipuiten mawhphurna sang tak an neih thu a sawi bawk.