Serchhip District-a NH. 54 zauhna tura ram lak sak mi 21 te hun bituk pe in an In thiat tura hriattir leh an ni

National Highway 54 laihzauh hna thawh meka Serchhip District chhunga dan anga ram lak leh zangnadawmna pek tawh, In la thiat lo mi 21 lai awmin heng mite hi Inrinni khan enfiah leh niin huntiam pe in an In te thiat tura hriattir leh an ni a. Hemi hun chhunga an inthiat lo a nih chuan thiah sak thlenga hmalak tum a ni.

Serchhip District Bawrhsap leh NH. 54 Widengin & Upgradation Project, Serchhip District-a Competent Authority for Land Acquisition (CALA) chuan August 29,2019 khan Serchhip District chhunga NH. 54 laihzauh hna thawhna tura ram lak sak te hi Section 3E (1) of the National Highway Act, 1956 in a sawi angin ni 60 chhunga chhuak turin thu a lo chhuah tawh a. Hemi hnu July 8, 2023 leh July 27, 2023-ah te zangnadawmna la tawh te hi an In thiat turin CALA hian thupek a chhuah leh tawh bawk a. Hei mai bakah hian July 27, 2023-a lehkha tihchhuah angin Magistrate leh Police te chuan a hmunah kala enfiahin ni 10 chhunga lo thiat turin an hriattir leh bawk a ni.

Hetianga hun pek chhung hian heng In neitute hian an In te an thiat ngei em tih chu an khaw Village Council kaltlanga vil zui a nih bakah DC Office-a National Highway (NH) Branch chuan Phone hmangin an vil zui bawk a. Amaherawh chu tun thlenga hma la mumal lo te an la awm avangin hemi chungchang ah hian Serchhip DC leh CALA chuan Serchhip SP chu a tul anga hma la tura ngenin Inrinni, Oct. 7, 2023-ah khan Serchhip District Executive Magistrate Lalhrualiana Zote hovin Police te leh NHIDCL aiawhte chuan a hmunah an enfiah leh a, heng In la thiat lo te hi hma la nghal tura hriattir leh an ni a, a tlangpuiin chawlhkar khat chhunga an In te lo thiat tura hun pek niin hemi hnu hian an hmalak dan enfiah leh a ni anga, hmalakna a awm lo te a nih chuan a tul angin an In te hi thiah tir emaw, thiah sak emaw a hmalak zui a ni dawn a ni.

Thudawn danin tun dinhmunah Serchhip District chhungah hian NH. 54 laihzauh tur avanga ram lak zingah zangnadawmna la chunga mahni In te la thiat duh lo hi mi 21 lai la awmin In thiat mek mi 11 an la awm bawk a. Khumtung khua ah In la thiat loh hi mi 4 la awmin Baktawng-ah mi 3 an awm bakah mi pakhat chuan an In an thiat mek a. Chhingchhip-ah In la thiat lo mi pahnih awmin mi 4 in an thiat mek a. Chhiahtlang-ah In la thiat lo mi 4 awmin mi 5 ten an thiat mek bawk. Keitum khua ah In la thiat lo mi 6 lai la awmin thiat mek an awm lo a, Bungtlang khua ah mi pahnih te chuan In la thiat lovin mi pakhat chuan an In an thiat mek bawk a ni.