National Wildlife Week pualin inzirtirna tum 8 nei

National Wildlife Week 2023 pualin Thenzawl Forest Division chuan nungcha humhalh kawnga inzirtirna (Awareness Campaign) hmun pariat (8) ah an buatsaih.

National Wildlife Week-2023 hi tun thla ni 2 atanga nimin, October 8, 2023 thleng khan rampumah hman a ni a, kumin hian ‘Partnership for Wildlife Conservation’ tih chu thupui ah hman niin kumin hi National Wildlife Week vawi 69-na a ni a. Thenzawl DFO Lalbiakchama Chawngthu chuan kumin-a he Hapta hman chhung hian hmun hrang hrang pariat (8)-ah nungcha humhalh kawnga inzirtirna (Awareness Campaign) an buatsaih thu sawiin, kumin-a Wildlife Week thupui in a duh angin, nungcha humhalh kawngah Department pahnih khat hmalakna te duhtawk mai lovin, mitin mawhphurhna a nih ang mitinin kan theihna zawn theuhah hmalak a pawimawh zia uar taka inzirtir a nih thu a sawi bawk.

Kumin a National Wildlife Week denchhen hian Zirtawpni khan Govt. High School, Then-zawl-a Zirlai leh Zirtirtute tan nungcha humhalh kawnga inzirtirna hi neih niin he hun hi Thenzawl DFO Lalbiakchama Chawngthu chuan a hmanpui a, he hunah hian nungcha humhalh kawnga mipuite leh sawrkar Department te thawhho pawimawh zia leh hma kan sawn theihna tur hrang hrang sawilan niin, a bik takin Mizorama Khuaino kan la nasa lutuk chu a pawi thu leh kan Lo/Huan thlai thar-chhuah (crop productivity) a chhe zawngin a nghawng nasa hle tih sawilan a ni a. Hemi kawnga nasa zawka zirtirna pek zel tum a nih thu tarlan a ni.