Serchhip-ah District Bawrhsap hovin Right to Information (RTI) Week hman a ni

Rampum-a Right to Information (RTI) Week hman mek chu nimin khan Serchhip-ah pawh hman niin he hun hi Serchhip District Bawrhsap David Lalthantluanga chuan khuallian niin a hmanpui a. He hunah hian RTI Dan chungchanga mipuite hriat tur pawimawh hrang hrang inhrilhfiah a ni.

Serchhip DC Conference Hall-a RTI Week puala hun hman ah hian Serchhip District Bawrhsap David Lalthantluanga chuan RTI Week chu kan ramah RTI a pawimawhzia lantirna tur leh RTI chungchang mipui mimir leh Official te pawhin an hriat zau a, kan hman tangkai thiam theihna tura inzirtirna hun atan hman thin a nih thu a sawi a. India ram chu khawvela democracy ram lian ber a ni tih sawiin, “Ram Danpui tha tak kan nei a, he Danpui hi kan ram hruaitu hmasa ten rilru leh ngaihtuahna zau taka sengin, Hnam hrang hrang, Tawng hrang hrang, Culture hrang hrang neite phuarkhawmtu, Constitution tha tak an duang chhuak a ni,” a ti a. Right to Information hi Indian Constitution-ah ziahlan ni lo mah se, he Constitution a tum bulpui atanga la chhuakin kum 2005 October 12 atang khan RTI Act hi siam leh hman a lo nih tak thu a sawi a ni.

Kum 2005-a RTI Act hman a nih atangin kum 18 lai a liam tawh thu leh he Dan hi Society ah inchiahin mihring te khawsak phung leh hmasawnna a zir zelin her rem leh tihphuisui chhoh chhunzawm zel a nih thu Bawrhsap chuan a sawi a. Tunah chuan Sawrkar Department leh PSU te chauh ni lo, Village Council thleng pawhin a huam tawh thu a sawi a. Mipuiten sawrkar atanga an hriat duh apiang an hriat theihna hmanrua RTI hi langtlang sawrkar siamna tura thil pawimawh, sawrkar khalh ngiltu leh sawrkar tha siamtu hmanraw tangkai tak a nih avangin mipuite chu RTI hmang uar deuh deuh turin a chah a, he Dan hman dan tlangpui pawh Bawrhsap hian a tarlang nghal bawk a ni.

Serchhip-a RTI Week puala inkhawm neih hi Serchhip Addl. DC James Lalnithanga chuan kaihruaiin Stephen Laltlansanga Auhmun, ARDO leh Master Trainer on RTI chuan RTI Act kalphung leh hman dan leh hriattur pawimawh hrang hrang a tarlang a. Sawrkar Department a thawktu thenkhat ten RTI hmanga Information dilna an dawn chu anmahni hna kallai tibuaitu ah an ngai thin tih sawiin, hei hi thil dik a nih loh thu leh an hna kallai ang bawka sawrkar in a ngaih pawimawh a nih thu a sawi a. RTI Act chu Information awmsa pekchhuahna tur a nih thu leh sawrkar hmalakna a lungawi lohna nei ten an harsatna an chinfelna tur ni lovin Information pawimawh an hmuhna tur zawk a nih thu a sawi a. RTI hmanga Information dilna sawrkar in a dawn te chu ngaih pawimawh hmasak berah neih tur a nih thu te, Sawrkar Official te pawhin Information dilna an dawn te chu a theih angin a diltu hnenah pek hram dan an ngaihtuah tur a nih thu leh RTI hmanga Information dilna te chu ni 30 chhunga chhan tur niin he ni 30 hian sawrkar Pisa chawlh te pawh a huam vek thu te a sawi bawk.

RTI Week hi October 5-12 chhunga hman tur niin he Hapta hman chhung hian District hrang hrangah hun hman tura ruahman a ni a, nimin a Ser-chhip-a he hun hmanna ah hian SPIO, SAPIO, khawtlang hruaitute, tlawmngai pawl hruaitute, Journalist te leh zirlai thahnem tak telin Serchhip DIPRO Lalnunmawii chuan lawmthu sawiin hun hnung a khar a ni.