RD Minister in Hall sak thar pahnih a hawng

Rural Development Minister Lalruatkima chuan nimin zing khan Sairang Dinthar Community Hall leh Sairang Community Hall-te chu a hawng.

Heng Hall pahnih hawnna hunah hian RD Minister chuan Sairang Dinthar leh Sairang in mamawh huna khawtlang mipui punkhawmna tur hmun pawimawh tak Community Hall changtlung tak an nei chu a lawmpui thu sawiin, Sawrkarin khaw tlawmngai leh tanpui ngaite tana pen chhuak thin Sairang leh a chhehvel khuate hmalakna chhuanawm a tih thu a sawi a. He huna kalkhawmte chu ram leh hnam hmangaihna leh dahsanna thinlung pu tlat tura chahin, Hnam, Ram leh Sakhua humhim bakah tlawmngaihna, huaisenna, rinawmna leh taimakna nena kan ram kan enkawl chuan kan intodelhin kan ram a dam ang a, kan dingchhuak thei dawn a ni, a ti.

Nimin-a hawn tak Sairang Dinthar Community Hall sak that hna hi cheng nuai 20 sengin BDO Tlangnuam kaltlanga thawh a ni a, a dung ft. 80 leh a vang ft. 30 a zau a ni a. Sairang Community Hall sak that hna hi BDO Tlangnuam hnuaiah cheng nuai 25.50 senga thawh ni bawkin, a dung ft. 70 leh a vang ft. 30 a zau a ni a. Community Hall pahnihte hian mamawh hrang hrangte a kengtel nghal bawk.