Kawng chhia vangin lirthei te tlan dawn rih lo

Mizoram mamawh bungraw phurtu inzawmkhawm, Joint Action Committee chuan Mizoram ei leh bar lakluhna kawng chhe lutuk siamthat phutin Vawiin (Oct. 9, 2023) atangin Sairang leh Vairengte inkarah tlan rih loh an tum tih an sawi.

Joint Action Committee-ah hian Mizoram Truck Owners’ Association, Truck Drivers’ Association, Mizoram Tippers Driver and Owners Association, Mizoram Oil Tanker Drivers Association leh Kolasib District Drivers Welfare Association te telin Mizoram Truck Owner Association President B. Lalzarzova chuan tunah hian Mizoram ei leh bar lakluhna kawng - Sairang leh Vairengte inkar, Kawlkulh atanga Hliappui, Kawlkulh atanga Tuichang te bakah Aizawl leh Imphal inkar te chu a chhe nasa hle tih sawiin, Kawng chhe zual tal siamthat a nih loh chuan Vawiin atangin bungraw phur motor zawng zawng Sairang leh Vairengte inkar leh Manipur lam atanga châk lakna kawnga tlan thin te an tlan dawn lo a ti a. An hmalakna zawmin Kolasib Maxi Cab te pawhin tlan loh an tum tih a sawi bawk.

Hetihlai hian Inrinni tlai khan Chief Minister Zoramthanga hovin Mizoram PWD hotute leh Joint Action Committee For Plyable Road chuan Lailapur leh Sairang inkar kawng chhia siamthat thuai dan tur sawiho in hmalak dan tur hrang hrang duan a ni a. Hemi ang hian Lailapur leh Sairang inkar kawng chhe zual lai thawmthat hna tha tak leh chak zawka thawh theih a nih theih nan leh motor lian tlan ten kawngpui siam sa an tih khaihlak loh nan helai inkar kawngah hian Vawiin, Oct. 9, 2023 atangin Motor lian tlan rih loh nise an ti a, Kawng siamthat hna thawk nghal tur hian NHIDCL lamin Seling leh Serchhip atangin Truck 30 lung phur chu nimin lam khan hnathawhna tura dah tan tura tih niin he kawng siam hna hi Vawiin atangin chak taka thawh tan tum a ni bawk a, kawng siam hna hi chak taka thawh tum niin Motor lian kal theiha siam a nih veleh motor lian pawh tlan chhunzawm leh a ni ang.

Hei bakah hian Teirei lei, Darlak a mi leh Bairabi Zamuang a mi thawh mek chu hna chak taka thawk chhunzawm turin PWD-in Contractor-te hriattir ni se an ti a, Tuichang to Kawlkulh kawng NHIDCL-in an enkawl pawh siamthat vat a nih theih nan DC, Khawzawl in NHIDCL leh PWD hotute kokhawmin hmalak vat dan tur relpui nise an ti bawk.

Hetianga lirthei khalhtu ten Sairang leh Vairengte inkara bungraw phur lirthei tlan loh an rêl avang hian Filling Station-ten POL an sem chhuah dan tur khuahkhirhna siam nghal a ni a. Hemi ang hian tum khat ah Two Wheeler tan litre 5 zel, LMV tan litre 10, MMV tan litre 20 leh HMV tan litre 40 zel pek tur a ni a, MS stock litre 5000 leh HSD Stock litre 7000 chin ah Department in ruahmanna a siam dawn bawk a ni.