Eiruk vangin kumin ah mi 11 thiam loh chantir tawh

Aizawl District Court-a Special Judge (Prevention of Corruption Act) Dr HTC Lalrinchhana chuan kumin chhungin eiruk thubuai nei thiam loh chantir mi 11 a nei tawh a, chung mite chu lung In tang tur leh pawisa chawi tura hrem an ni.

Kumin chhunga Court in thiamloh chantira a hrem tawh te hi NRHMA-a Mission Director leh Health Services Department- Director hlui Dr. N. Pallai chu kum khat lung in tang tur leh cheng nuai 24 chawi tura hrem niin a pawisa chawi tur hi a pe thei lo a nih chuan kum 12 tan belh tura tih a ni a. PWD Khawzawl Division-a JE ni thin C. Lalfakawma chu kum li lung In tang tur leh cheng nuai 2 chawi tura hrem a ni a, a pawisa chawi tur hi a pe thei lo a nih chuan kum khat thleng a tan belh ang.

Chakma Autonomous District Council-a Chief Executive Member (CEM) hlui leh Chairman ni lai, Kali Kumar Tongchangya chu kum li tang tur leh cheng nuai 4 chawi tura hrem a ni a, a pe thei lo a nih chuan kum hnih dang tan belh tura tih niin MAMCO-a Consultant ni thin Mustaqur Rahman pawh kum nga tang tur leh cheng nuai 20 chawi tura hrem a ni a, pawisa chawi tur hi a nei lo a nih chuan kum 20 lung in tanin a tlak ang. 

Telecom Department-a Officer hlui, Subhrendu Deb Roy chu kum khat lung in tang tur leh cheng nuai 3 chawi tura hrem a ni bawk a, pawisa chawi tur hi a pe thei lo a nih chuan kum thum a tan belh ang. Heng bakah hian Tuirial Hydel Project siamna tura NEEPCO hmalakna a ram lakna leh zangnadawmna pek chungchangah mi paruk - C. Vanlalchhuana, Electric Veng, Aizawl; Saiaithanga, Tuithiang, Aizawl; C. Rokhumi, Durtlang, Aizawl; Lalduhawma, Durtlang Leitan; K. Lalrawna, Champhai Bethel leh P.C. Lalthazovi, Durtlang Leitan te pawh thiam loh chantir an ni tawh bawk a ni.