Deputy Chief Minister in building thar a hawng

Tuichang bialtu MLA leh Deputy Chief Minister Tawnluia chuan nimin khan Khawzawl Higher Secondary School-ah Science & Commerce Building thar a hawng.

Building thar hawnna puala Inkhawm neih ah Deputy Chief Minister chuan Khawzawl HSS Science & Commerce Building hawn a ni ta chu hlawhtlinna ropui tak, hmasawnna rahbi pakhat a nih thu sawiin, Khawzawl HSS provincialised a ni ta chu zirlai leh zirtirtute a lawmpui thu a sawi a. Mizoram sawrkar chuan thalaite hmasawnna atan zirna mai bakah infiamna leh mahni kutkawiha eizawnna (entrepreneurship) tihhmasawn a ngaipawimawh hle, a ti a. Cabinet Meeting hnuhnung berah Mizoram chhunga School 311 zet te chu dinhmun tha zawkah sawrkarin a hlankai thu sawiin, Khawzawl District chhungah ngei pawh School 15 zet chu dinhmun tha zawkah hlankai an nih thu a sawi a. Sawrkarin Lumpsum-a School a puihna pawh tihsan a nih thu sawiin, Category A in cheng nuai 6, Category B in cheng nuai 4, Category C in cheng nuai 2.5 an dawng tawh dawn tih a tarlang bawk.

Khawzawl HSS Science & Commerce Building hi cheng nuai 244.4 senga sak a ni a. Mizopa chhiara chhawng thum-a sang niin Ground Floor-ah hian Science Laboratory a awm a, First Floor-ah Teachers’ Common Room, Principal Room leh Art & Craft Room te a awm a, Second Floor-ah hian Classroom pali awmin, Floor tinah hian mipa leh hmeichhe inthiarna a awm bawk. Khawzawl HSS Science Stream hi kum 2016-a din a ni a, Commerce Stream hi kum 2019-ah din a ni thung a. Tun dinhmunah zirlai 51 awmin, Zirtirtu 11 in an enkawl mek a ni.

Comments

Popular News (Last 30 Days)

LPG man bithliah thar