Cricket-ah Mizoram aiawh turin Serchip DCA a mi thlang

Serchhip District Cricket Association Academy-a zirchhuak Hmingthanpuia (Hmingthana) chu Mizoram aiawha Under-16 khel tura thlan niin tun thla ni 17 khian Mizoram an chhuahsan ang.
Serchhip District Cricket Association hun hun engemaw chen Cricket Academy hi kalpui tawhin naupang engemaw zat chu Cricket khelh dan zirtirin Coach tha zawk te pawh rawih an lo ni tawh a, he Academy-a zirchhuak Hmingthan-puia s/o Lalkungi, New Serchhip chu India rama Age Group Level (Under-16)-a Cricket-a inelna sang Vijay Merchant Trophy-ah Mizoram aiawh tura thlan niin tun thla ni 17 khian inelna neihna hmun tur Chandigarh panin an chhuak dawn a, Goa leh Jammu & Kashmir an hmachhawn dawn a ni.

Serchhip DCA chuan Mizoram Men’s Under-16 Vijay Merchant Trophy Team 2023-2024 Season atana Serchhip DCA Academy chhuak Hmingthanpuia thlan a ni chu an lawmpui takzet tih sawiin, “Hmingthana hi kum naupangte la ni mahse Serchhip DCA tan tum hnih lai a lo feh chhuak tawh a, Serchhip DCA Player pawimawh tak te zinga mi a ni,” tiin duhsakna an hlan bawk a ni. Serchhip DCA chuan October 2023 atang hian Serchhip-ah Cricket Academy hi kalpui leh mek a nih thu sawiin, Cricket zir duh tan tlai dar 3:30-ah Leisekawt Mual-a Cricket practice-na hmun ah kal theih a nih thu an sawi bawk.