Assam sawrkar atangin chhanna dawng ta

Mizoram sawrkar Home Department chuan Assam Home Department hnen atangin kumin February thla a ramri buai chungchanga Assam sawrkar hnena lehkha an thehluh chhanna chu Inrinni khan a dawng ta.

Home Department hotute sawi danin kumin February thla-a Assam sawrkar hnena lehkha an thawn, ‘Assam sawrkarin a ramchhunga awm ni a a hauh khaw 62 chu Mizoram chhung ami a ni e,’ ti a an hriattirna chhanna chu Assam sawrkar hnen atangin Inrinni, Oct. 7, 2023 khan an dawng a, Assam sawrkar chuan Mizoramin a ram chin ni a a chhal chhunga khaw 62-ah hian Mizo an cheng lo niin a rawn sawi a. Hei hi Assam Border Protection and Development Department-in Barak phairuam a District 3 Bawrhsap te a hmuna enfiah tura a hriattir anga an enfiah hnua an hmuhchhuah report behchhan a nih thu an tarlang a ni.

Home Department Official-te chuan he'ng khaw 62 te hi ‘Mizote luah a nih vanga Mizoram chhung ami a ni e,’ ti a an hauh loh thu an sawi a. Bengal Eastern Frontier Regulations, 1873 tlawhchhana kum 1875-a British sawrkar hriattirna chhuah behchhana Mizoram chhung a ni tih chu an pawm dan a nih thu an sawi. Tripura Jampui tlangdung leh a chhehvelah te, Cachar hmun thenkhatah te Mizote luah ram zau tak a awm thu leh Manipur tlangram a Zofate luah chin pawh ‘Mizoram chhung a ni e,’ tiin Mizoram sawrkar in a hauh lo niin Official-te chuan an sawi a. Helai a khaw 62-te hi Mizoram chhunga awm a nihna chhan chu kum 1875-a British sawrkarin British ram chhung Cachar leh Lushai ram an tih (Mizoram) inrina a rin a Lushai ram chhunga a rinluh a nih thu an sawi a. Hetih hunlai hian helai bial hi Inner Line Forest Reserve ram a puan a nih avangin mihring an awm ngai lo niin an sawi a. Tuna luahtute hi Assamese leh Mizo pawh an ni lova, East Pakistan an tih thin Bangladesh atanga dan kalha lo lut a luah ve ta ngawtte an nih thu an sawi bawk.

Comments

Popular News (Last 30 Days)

LPG man bithliah thar