Serchhip-ah Mizoram State Anti Tobacco Day hmangin Vaihlo that loh zia inzirtirna neih a ni

Mizoram State Anti Tobacco Day vawi 10-na chu nimin khan Mizoram hmun hrang hrangah hman niin Serchhip-ah pawh National Tobacco Control Programme (NTCP) bultumin Govt. Higher Secondary School-ah 'Towards 100% Tobacco Free Educational Institution' tih thupui hmangin he ni hi hman a ni.

Govt. Higher Secondary School Hall-a Mizoram State Anti-Tobacco Day puala hun hman hi Serchhip District Education Officer (DEO) Lawmawma chuan khuallian nia hmanpuiin Vaihlo leh a kaihhnawih hrim hrim chu zirna In atanga yard 100 ah zawrh phal a nih loh bakah School Campus chhungah hman phal a ni lo tih sawiin, Quarter tina zirna In ten an report thehluh ah zuk leh hmuam dona an ngaih pawimawh dan enfiah a ni thin dawn tih a sawi a. Thalaite chu an taksa chaklai, tun dinhmun ah zuk leh hmuam avangin harsatna tawk lo pawh nise a ngawl an veina in nghawng tha lo neiin natna dang an tawrh phah theih avangin zuk leh hmuam laka an fihlim a pawimawh thu a sawi a. Zirlaite chu ngun taka ngaihtuahna senga, thil tha lo ti thin an awm chuan bansan mai tur anih thu leh zuk leh hmuam chu thil thalo tak a ni tih hriaa a ti ngailo ten tichhin hauhlo tur leh lo ti tawh an awm pawha bansan turin a sawm a; Zirtirtute pawh mei zu an awm a nih chuan sim tura a duh thu a sawi a. Serchhip District chu District te, mihring cheng pawh an tlemna a nih thu sawiin, ziak leh chhiar thiam tamna ber pawl a nih avangin phai lama mithiamte pawhin rawn tlawh an chak thin thu leh hmun dang amite hmuhah lehkha thiam tam ni mai lova thiamna tak tak nei tura hmasawn tura tan kan lak a tul thu a sawi bawk.


He hun kaihruaitu Serchhip Sr. Chief Medical Officer Dr. LP. Malsawma chuan tun dinhmunah Mizoram chu India ram-a vaihlo hmang nasa ber dawttu leh harsatna tuar nasa ber State kan nih mek thu a sawi a. Vaihlo leh a kaihhnawih that lohzia hi thahnemngai tak leh theihtawp chhuaha mipuite zirtirna pek mek zel niin hmasawnna lawmawm tak a awm thu a sawi bawk a ni.

He hunah hian Serchhip District-a National Tobacco Control Programme (NTCP) Nodal Officer Dr. Lallawmkimi Chhakchhuak chuan kumtin May 31-ah 'World No Tobacco Day' hman thin a nih thu leh September 11-ah 'Mizoram State Anti-Tobacco Day' hi hman tura ruahman angin kumin hian a vawi 10-na atan hman a nih thu a sawi a. Vaihlo leh a kaihhnawih kan hman nasat avangin natna chi hrang hrang kan tawrh theih thu leh kan nunna a hun hmaa titawp theitu a nih thu te, Vaihlo leh a kaihhnawih te hi a ei chi leh a zuk chi te pawh a awm thu sawiin, Mizoram-ah puitling kum 15 chung lam za zela 58 te chuan Vaihlo leh a kaihhnawih an hman thu leh thalai kum 13-15 zingah za zela 58.7 in an hman thu a sawi a. Naupang te hnena Vaihlo leh a kaihhnawih hralh chu Dan bawhchhiatna a nih thu sawiin, nu leh pa te pawhin kan fate hetiang thil lei tura tirh thin loh tur a nih thu leh naupangte rilru ah thil tha lo a ni tih kan tuh zawk a pawimawh thu a sawi a. Vaihlo leh a kaihhnawih chu zirna In atanga yard 100-ah hman leh zawrh khap tlat a nih thu pawh sawiin, hemi dan zawm lo te chu zirna In-a hotute pawhin an man theih thu a sawi bawk.


NTCP District Consultant K. Hmingthan-sangi Report atanga a lan danin sawrkar kum kal mekah hian August thla thleng khan Tobacco Cessation Clinic pantu mi 124 awm tawhin, an zinga mi 15 in vaihlo leh a kaihhnawih an bansan tawh a. Zirna In hrang hrang 74 ah Vaihlo thatloh zia inzirtirna neiin zirna In 19 chu Tobacco Free Educational Institution (ToFEI) ah puan an ni tawh a. Anti Tobacco Squad-te tum 13 fe chhuakin dan bawhchhia mi 43 an man a, an pawisa chawi tlingkhawm chu Rs. 2050/- a ni.

Nimin-a he hun hmanna a tel te hian Vaihlo leh a kaihhnawih laka fihlima tura thu-tiam an la bawk a ni.

Comments

Popular News (Last 30 Days)

LPG man bithliah thar