Rel kawng siam-a vanduaina thleng thlirhona nei

Tunhnaia Sairang Zero Point bula Railway Leidawh chim avanga chhanchhuah hna leh ruang senghawi hna thawktute hnathawhdan thlirletna leh sawihona (Debriefing) chu nimin khan Home Minister Lalchamliana hovin neih a ni.

Taxation Department Auditorium-a he hun hmanna ah hian Home Minister Lalchamliana chuan tunhnaia Rel kawnga leidawh lai chim avanga Mizoram chhunga chhiatna rapthlak tak lo thleng chu pawi a tih thu a sawi a. Khuarel Chhiatrupna chu thil lo thleng thei leh dan rual a nih loh thu sawiin, mihring siamchawp chhiatna lo thleng thin te erawh a tam zawk chu kan pumpelh theih thil a nih thu a sawi a. Hmasawnna ruhrel pawimawh tak rel kawng siam mek a vanduaina lo thleng ah chhanchhuah hna thawktute, a hnua ruang senghawi hna thawktute leh ruang thawnchhuah hna thawh dan te thlirletin thawktute'n hna tha tak an thawk ni ah a ngai a. He hmalakna kalpui dan sawihona leh thlirletna hian chhiatrupna dang lo thleng thulh ah remhriatna leh awmze nei zawk a hnathawh dan turah ngaihtuahna fing zawk min pe dawn a ni, a ti bawk.

Home Minister chuan he vanduaina ah hian Chief Secretary leh a hnuaia Secretary, DM&R, Aizawl Bawrhsap, SP leh SP Traffic bakah a chhehvela YMA, VC te, khawtlang hruaitute leh Mipuite, NDRF, SDRF, DC office hnuai QRT te, BSF te leh State Police te'n hna tha tak an thawk tih sawiin, nunna hlu tak 3 chhanchhuah hna hautak leh hlauhawm tak tlin taka thawktu Mizo tlangval te huaisenna leh themthiamna a fak bawk a. DM&R in a mamawh hmanrua te a theih anga tihchangtlun zel a nih dawn thu sawiin, tunah hian hetiang Chhiatrupna lo thlenthulh a tangkai em em, Drone lian chi pawh lei tum a nih thu a sawi bawk.

He hunah hian Chief Secretary Dr. Renu Sharma pawhin Sairang Zero Point bula vanduaina thleng an hriat tirh atanga sawrkarin chet a lak dan te a sawi a, Chhanchhuah hnathawktu - NDRF, SDRF, QRT, Medical Team leh Official te tha taka khawtlang mipuiin an thlawp chu State dangte tana entawntlak a nih thu a sawi a. A bik takin vanduaina thlenna hmuna lo thleng hmasa YMA member te chungah lawmthu sawiin, an hnathawh dan chu ropui a tih thu leh an chhuanawm thu a sawi bawk.

Nimin-a Debriefing session on Response During Collapse of Railway Bridge (under construction) at Sairang neih ah hian chhanchhuah hna thawktute chawimawina hun hman niin Aizawl DDMA and QRT, Superintendent of Police, Aizawl District, Superintendent of Police (Traffic Police), Forensic Science Laboratory, CMO West & Civil Hospital, Aizawl, SDRF from 1st & 3rd MAP, 5th IR, 1st Bn NDRF, 38th Bn BSF, Mizoram Police Dog (Canine) Squad, CYMA, YMA leh VC, Sairang, Sairang Dinthar leh Sihhmui te chawimawina hlan an ni.